Жорий йилнинг 6 октябрь куни Коррупцияга қарши курашиш агентлигида ОАВ вакиллари ва блогерлар иштирокида матбуот анжумани ташкил этилди.

Унда Агентлик раҳбари Акмал Бурханов томонидан кенг жамоатчиликка ўтган вақт давомида бажарилган ишлар ҳамда келгуси режалар ҳақида ахборот берилди. Жумладан, Агентлик томонидан амалга оширилаётган халқаро ҳамкорлик йўналишлари, тузилмага малакали ходимларни ишга қабул қилиш жараёнлари, фаолиятга доир қонун лойиҳаларини ишлаб чиқиш масалалари, “комплаенс назорат” тизимини жорий этилишидаги вазифалар каби муҳим мавзуларга тўхталиб ўтилди. 

Таъкидланганидек, Коррупцияга қарши курашиш агентлиги бир қатор халқаро ташкилотлар билан самарали ҳамкорлик ва мулоқотни йўлга қўйди. Агентликка малакали ходимларни очиқ конкурс асосида ишга қабул қилиш жараёни якунлари ҳақида ахборот берилди.

Маълумки, ҳар соҳанинг тўлақонли фаолият олиб бориши учун мукаммал қонунчилик базаси мавжуд бўлиши керак. Агентлик бу борада ҳам ишларни бошлаб юборган. Хусусан, “Ўзбекистон Республикасида коррупцияга қарши курашиш тизимини такомиллаштириш бўйича қўшимча чора-тадбирлар тўғрисида”ги фармонига мувофиқ халқаро экспертларни жалб этган ҳолда «Ўзбекистон Республикаси коррупцияга қарши курашиш агентлиги тўғрисида»ги қонун лойиҳаси ишлаб чиқилди ва жамоатчилик муҳокамасига тақдим этилди.

Ўтган қисқа вақт давомида, Ўзбекистон Республикаси Ҳисоб палатаси, Бош прокуратура, Адлия вазирлиги ва бошқа манфаатдор ташкилотлар билан биргаликда 26 та давлат ва хўжалик бошқаруви органларида коррупцияга қарши “комплаенс-назорат”ни тизимини жорий этиш бўйича “йўл хариталари” ишлаб чиқилди ва тасдиқланди.

Анжуманда Агентлик Инқирозга қарши курашиш жамғармаси маблағларини мақсадли сарфланишини ўрганётганлиги ҳам маълум қилинди. Ҳозиргача Санитария-эпидемиология хизмати, соғлиқни сақлаш ва бошқа йўналишларда 50 дан ортиқ ҳолатларда қонун бузилиши ҳолатлари аниқланган.

Очиқ руҳда бўлиб ўтган мулоқотда агентлик олдидаги режалар тўғрисида ҳам батафсил ахборот берилди. Эътиборлиси фуқароларимиз коррупцион ҳолатлар бўйича тезкор мурожаат қилиш имкониятини таъминловчи янги электрон платформа тақдимоти ўтказилди. Ҳамкор ташкилотлар билан биргаликда ишлаб чиқилаётган ушбу платформа орқали давлат идораларининг коррупцияга қарши курашиш бўйича фаолияти мониторинг қилиб бориш имконияти ҳам мавжуд.

Шу билан бирга Ўзбекистон тарихида илк марта коррупциянинг даражасини баҳоловчи Коррупцияни қабул қилиш миллий индексини ишлаб чиқилмоқда. Бу борада БМТнинг Тараққиёт дастури методологик кўмак кўрсатётганлиги таъкидланди. Бунда вазирлик, идораларда қайси соҳада коррупцион ҳолатлар кўплиги, қайси давлат хизматчилари коррупцияга мойиллиги тўғрисида ахборот билан жамоатчилик таништириб борилади. Бу жараёнда давлат идоралари раҳбарлари ва ҳудудлар кесимида рейтинглар эълон  қилиб борилади. Агентлик томонидан мавжуд норматив-ҳужжатларини коррупцияга қарши инвентаризациядан ўтказишни ҳам режалаштирилгани маълум қилинди.

Матбуот анжумани якунида журналистлар ўзларини қизиқтирган саволларга батафсил жавоблар олишди.