13 декабрь куни Миср Араб Республикасида БМТнинг Коррупцияга қарши конвенцияси иштирокчи давлатларининг навбатдаги йиллик конференцияси бошланди.

Бирлашган Миллатлар Ташкилоти ГЖБ томонидан ташкил этилган конференцияда 150дан зиёд мамлакатлар делегациялари, шу жумладан, бир қатор давлат раҳбарлари, коррупцияга қарши курашиш идоралари раҳбарлари, халқаро ташкилотлар вакиллари ҳамда экспертлар иштирок этмоқда.

Маълумот учун: Иштирокчи давлатлар конференцияси БМТ Коррупцияга қарши конвенциясининг сиёсатини белгилаб берувчи муҳим воқеалик ҳисобланади. Унда давлатларнинг Конвенцияни имплементация қилиш салоҳиятини ошириш, унда кўзда тутилган мақсадларга эришиш учун давлатлараро ҳамкорликни кучайтириш ва Конвенциянинг бажарилишини рағбатлантириш каби мақсадларни амалга оширилиши ҳолати масалалари сарҳисоб қилинади.

Ушбу муҳим тадбирда Коррупцияга қарши курашиш агентлиги директори раҳбарлигидаги Ўзбекистон делегацияси таркибида Олий Мажлис Сенати, Бош прокуратура, Коррупцияга қарши курашиш агентлиги ҳузуридаги жамоатчилик кенгаши вакиллари иштирок этмоқда.

Конференциянинг очилиш маросимида БМТ бош котиби жаноб Антониу Гутерриш кириш сўзи билан иштирок этиб, мамлакатлар COVID-19 пандемиясидан халос бўлишга сармоя киритар экан, маблағларни толон-торож қилиниши оқибатида ҳаётий зарур ресурсларни ўзлаштиришдан эҳтиёт бўлиш кераклигини таъкидлади.
 

Конференциянинг жорий йилги сессиясида Конвенцияга аъзо мамлакатлар томонидан  коррупцияга қарши курашиш соҳасида амалга оширилган ишлар, ҳал қилиниши лозим бўлган долзарб масалалар ҳамда истиқболдаги режалар муҳокама қилинмоқда.

Шу билан бирга, конвенциянинг ҳар бир бобини амалиётга татбиқ этиш бўйича амалиётчилар, хорижий ва халқаро экспертлар иштирокида сессияларда муҳокамалар ўтказилиши режалаштирилган. 

Аҳамиятлиси, мазкур конференция доирасида Ўзбекистон томонининг ташаббуси билан Ўзбекистонда коррупцияга қарши курашиш жараёнларини рақамлаштириш, шунингдек, коррупцияга қарши жараёнларида жамоатчиликнинг ўрни масалаларида иштирокчи мамлакатлари учун махсус сессиялар ташкил этилади.

Бундан ташқари, Агентли вакилларининг қатор хорижий ҳамкасблар билан икки томонлама учрашувлар ташкил этилиши режалаштирилган. Конференция жорий йилнинг 17 декабрь кунига қадар давом этади.