2020 yil 20 avgust kuni O‘zbekiston Respublikasi Korrupsiyaga qarshi kurashish milliy kengashining birinchi yig‘ilishi bo‘lib o‘tdi. Videokonferensaloqa tarzida o‘tkazilgan yig‘ilishni O‘zbekiston Respublikasi Oliy Majlisi Senati Raisi, Milliy kengash raisi Tanzila Narbaeva olib bordi.

Tadbirda senatorlar, Kengash a'zolari, davlat hokimiyati va boshqaruvi organlari, ilmiy-tadqiqot muassasalari mutasaddilari hamda ommaviy axborot vositalari vakillari ishtirok etdi.

Ta'kidlanganidek, O‘zbekiston Respublikasi Prezidentining 2020 yil 29 iyundagi “O‘zbekiston Respublikasida korrupsiyaga qarshi kurashish tizimini takomillashtirish bo‘yicha qo‘shimcha chora-tadbirlar to‘g‘risida”gi Farmoni bilan O‘zbekiston Respublikasi Korrupsiyaga qarshi kurashish agentligi tashkil etildi. Shu bilan birga, Korrupsiyaga qarshi kurashish bo‘yicha respublika idoralararo komissiyasi va uning hududiy idoralararo komissiyalari O‘zbekiston Respublikasi korrupsiyaga qarshi kurashish milliy kengashi va uning hududiy kengashlari etib qayta tuzildi.  

So‘nggi uch yilda mamlakatimizda korrupsiyaning oldini olish va unga qarshi kurashish, davlat va jamiyat qurilishining barcha sohalarida korrupsiogen omillarga chek qo‘yishga qaratilgan 10 dan ortiq normativ-huquqiy hujjatlar qabul qilinib, “Yo‘l xaritalari” hamda chora-tadbirlar rejalari tasdiqlandi. Qolaversa, “Korrupsiyaga qarshi kurashish to‘g‘risida”gi Qonuni bilan har bir davlat organining vazifalari aniq belgilab berildi.

Qator xalqaro nodavlat notijorat tashkilotlari bilan rasmiy aloqalar yo‘lga qo‘yilib, xalqaro reytinglarda mamlakatimizni yuqori pog‘onalarga ko‘tarish bo‘yicha tizimli ishlar olib borildi.

Yig‘ilishda byurokratik to‘siqlarni bartaraf etish va “yashirin iqtisodiyot”ni qisqartirish choralari ko‘rilayotgani hamda “Korrupsiyasiz soha” loyihalari amalga oshirilayotgani qayd etildi.

Shunga qaramay, korrupsiya holatlari hali ham kuzatilayotganligi, bundan xalqimiz aziyat chekayotganligi, shu sababli O‘zbekiston Respublikasi Korrupsiyaga qarshi kurashish agentligining va O‘zbekiston Respublikasi korrupsiyaga qarshi kurashish milliy kengashining faoliyatlarini to‘g‘ri yo‘lga qo‘yilishiga alohida e'tibor qaratish lozimligi ta'kidlandi.

Jumladan, Milliy Kengash nizomi loyihasini, “Korrupsiyaga qarshi kurashish bo‘yicha 2021–2025 yillarga mo‘ljallangan milliy strategiya” va “Milliy strategiya doirasida Korrupsiyaga qarshi kurashish bo‘yicha 2021–2022 yillarga mo‘ljallangan davlat dasturi” loyihalarini ishlab chiqish hamda mazkur yo‘nalishda bir qator qonunlarni takomillashtirish zarurligi ta'kidlandi.

Shuningdek, yig‘ilishda ushbu Farmonda belgilab berilgan vazifalar ijrosi yuzasidan Kengash a'zolari tomonidan ma'lumot berildi. Xususan, Agentlikning korrupsiyaning oldini olish va unga qarshi kurashish sohasidagi maxsus vakolatli davlat organi sifatida bajarishi lozim bo‘lgan ishlari, 2020–2021 yillarda barcha davlat va xo‘jalik boshqaruvi organlarida korrupsiyaga qarshi ichki nazorat tizimini bosqichma-bosqich joriy etish, O‘zbekistonning bu sohada xalqaro reytinglardagi o‘rnini yaxshilash bo‘yicha tegishli “Yo‘l xarita”larini ishlab chiqish, uy-joy kommunal xo‘jaligi, suv xo‘jaligi, qurilish va energetika sohalarida davlat xaridlari, davlat mulkini boshqarish va undan foydalanishda qonun hujjatlariga rioya etilishi holati bo‘yicha o‘rganish o‘tkazish, “E-Anticor.uz” elektron platformasini va korrupsiya holatlari haqida Agentlikni xabardor qilish imkonini beruvchi maxsus mobil dasturni joriy etish masalalariga urg‘u berildi.  

Shuningdek, davlat va xo‘jalik boshqaruvi tizimida korrupsiyaga qarshi “komplaens-nazorat” tizimini joriy etish, 2021 yildan boshlab investisiya loyihalarini amalga oshirishdan avval “korrupsiyaga qarshi ekspertiza” o‘tkazish tizimi yo‘lga qo‘yish, xalqaro ekspertlarni jalb etgan holda O‘zbekiston Respublikasining korrupsiyaga qarshi kurashish sohasida xalqaro reytinglardagi o‘rnini yaxshilash kabi kelgusi muhim rejalar muhokama qilindi.

Yana bir jihat. O‘zbekiston Respublikasi Prezidentining 2019 yil 27 maydagi qarori bilan eksperiment tariqasida, dastlabki bosqichda kapital qurilish va oliy ta'lim sohalarida “Korrupsiyasiz soha” loyihasini amalga oshirish, 2020 yil 1 apreldan boshlab loyihani boshqa sohalarga ham bosqichma-bosqich joriy etish belgilangan edi.

Yig‘ilishda bugungi kunda eng muhim bo‘lgan sohalar, ya'ni sog‘liqni saqlash hamda davlat xaridlari tizimida “Korrupsiyasiz soha” loyihasini amalga oshirish taklif etildi. Shu jihatdan mazkur yo‘nalishlarda “Korrupsiyasiz soha” loyihasini tayyorlash va amalga oshirish bo‘yicha ishchi guruhlari tuzildi.

Ko‘rib chiqilgan masalalar yuzasidan tegishli qaror qabul qilindi.