2020 йил 20 август куни Ўзбекистон Республикаси Коррупцияга қарши курашиш миллий кенгашининг биринчи йиғилиши бўлиб ўтди. Видеоконференцалоқа тарзида ўтказилган йиғилишни Ўзбекистон Республикаси Олий Мажлиси Сенати Раиси, Миллий кенгаш раиси Танзила Нарбаева олиб борди.

Тадбирда сенаторлар, Кенгаш аъзолари, давлат ҳокимияти ва бошқаруви органлари, илмий-тадқиқот муассасалари мутасаддилари ҳамда оммавий ахборот воситалари вакиллари иштирок этди.

Таъкидланганидек, Ўзбекистон Республикаси Президентининг 2020 йил 29 июндаги “Ўзбекистон Республикасида коррупцияга қарши курашиш тизимини такомиллаштириш бўйича қўшимча чора-тадбирлар тўғрисида”ги Фармони билан Ўзбекистон Республикаси Коррупцияга қарши курашиш агентлиги ташкил этилди. Шу билан бирга, Коррупцияга қарши курашиш бўйича республика идоралараро комиссияси ва унинг ҳудудий идоралараро комиссиялари Ўзбекистон Республикаси коррупцияга қарши курашиш миллий кенгаши ва унинг ҳудудий кенгашлари этиб қайта тузилди.  

Сўнгги уч йилда мамлакатимизда коррупциянинг олдини олиш ва унга қарши курашиш, давлат ва жамият қурилишининг барча соҳаларида коррупциоген омилларга чек қўйишга қаратилган 10 дан ортиқ норматив-ҳуқуқий ҳужжатлар қабул қилиниб, “Йўл хариталари” ҳамда чора-тадбирлар режалари тасдиқланди. Қолаверса, “Коррупцияга қарши курашиш тўғрисида”ги Қонуни билан ҳар бир давлат органининг вазифалари аниқ белгилаб берилди.

Қатор халқаро нодавлат нотижорат ташкилотлари билан расмий алоқалар йўлга қўйилиб, халқаро рейтингларда мамлакатимизни юқори поғоналарга кўтариш бўйича тизимли ишлар олиб борилди.

Йиғилишда бюрократик тўсиқларни бартараф этиш ва “яширин иқтисодиёт”ни қисқартириш чоралари кўрилаётгани ҳамда “Коррупциясиз соҳа” лойиҳалари амалга оширилаётгани қайд этилди.

Шунга қарамай, коррупция ҳолатлари ҳали ҳам кузатилаётганлиги, бундан халқимиз азият чекаётганлиги, шу сабабли Ўзбекистон Республикаси Коррупцияга қарши курашиш агентлигининг ва Ўзбекистон Республикаси коррупцияга қарши курашиш миллий кенгашининг фаолиятларини тўғри йўлга қўйилишига алоҳида эътибор қаратиш лозимлиги таъкидланди.

Жумладан, Миллий Кенгаш низоми лойиҳасини, “Коррупцияга қарши курашиш бўйича 2021–2025 йилларга мўлжалланган миллий стратегия” ва “Миллий стратегия доирасида Коррупцияга қарши курашиш бўйича 2021–2022 йилларга мўлжалланган давлат дастури” лойиҳаларини ишлаб чиқиш ҳамда мазкур йўналишда бир қатор қонунларни такомиллаштириш зарурлиги таъкидланди.

Шунингдек, йиғилишда ушбу Фармонда белгилаб берилган вазифалар ижроси юзасидан Кенгаш аъзолари томонидан маълумот берилди. Хусусан, Агентликнинг коррупциянинг олдини олиш ва унга қарши курашиш соҳасидаги махсус ваколатли давлат органи сифатида бажариши лозим бўлган ишлари, 2020–2021 йилларда барча давлат ва хўжалик бошқаруви органларида коррупцияга қарши ички назорат тизимини босқичма-босқич жорий этиш, Ўзбекистоннинг бу соҳада халқаро рейтинглардаги ўрнини яхшилаш бўйича тегишли “Йўл харита”ларини ишлаб чиқиш, уй-жой коммунал хўжалиги, сув хўжалиги, қурилиш ва энергетика соҳаларида давлат харидлари, давлат мулкини бошқариш ва ундан фойдаланишда қонун ҳужжатларига риоя этилиши ҳолати бўйича ўрганиш ўтказиш, “E-Anticor.uz” электрон платформасини ва коррупция ҳолатлари ҳақида Агентликни хабардор қилиш имконини берувчи махсус мобил дастурни жорий этиш масалаларига урғу берилди.  

Шунингдек, давлат ва хўжалик бошқаруви тизимида коррупцияга қарши “комплаенс-назорат” тизимини жорий этиш, 2021 йилдан бошлаб инвестиция лойиҳаларини амалга оширишдан аввал “коррупцияга қарши экспертиза” ўтказиш тизими йўлга қўйиш, халқаро экспертларни жалб этган ҳолда Ўзбекистон Республикасининг коррупцияга қарши курашиш соҳасида халқаро рейтинглардаги ўрнини яхшилаш каби келгуси муҳим режалар муҳокама қилинди.

Яна бир жиҳат. Ўзбекистон Республикаси Президентининг 2019 йил 27 майдаги қарори билан эксперимент тариқасида, дастлабки босқичда капитал қурилиш ва олий таълим соҳаларида “Коррупциясиз соҳа” лойиҳасини амалга ошириш, 2020 йил 1 апрелдан бошлаб лойиҳани бошқа соҳаларга ҳам босқичма-босқич жорий этиш белгиланган эди.

Йиғилишда бугунги кунда энг муҳим бўлган соҳалар, яъни соғлиқни сақлаш ҳамда давлат харидлари тизимида “Коррупциясиз соҳа” лойиҳасини амалга ошириш таклиф этилди. Шу жиҳатдан мазкур йўналишларда “Коррупциясиз соҳа” лойиҳасини тайёрлаш ва амалга ошириш бўйича ишчи гуруҳлари тузилди.

Кўриб чиқилган масалалар юзасидан тегишли қарор қабул қилинди.