Muxbir Daliyevning “facebook”dagi ijtimoiy tarmog‘idagi profilida “Qurilishdagi korrupsion omillarga kim barham bera oladi?” nomli maqola chop etilgan. Unda Andijon viloyatida qurilish sohasida sodir etilayotgan qonunbuzishlariga munosabat bildirilmayotgani tanqid qilingan.

Ma’lumot o‘rnida shuni takidlash lozimki, Korrupsiyaga qarshi kurashish agentligi tomonidan Hisob palatasi va boshqa vazirlik hamda idoralar bilan hamkorlikda qurilish sohasida o‘rganishlar o‘tkazildi.

Jumladan, Andijon, Jizzax va Navoiy viloyat hokimliklarining “Yagona buyurtmachi xizmati” injiniring kompaniyalari va boshqa buyurtmachi tashkilotlarida jami 461,3 mlrd. so‘mlik qiymatdagi davlat xaridlari yuzasidan 59 ta qurilish obyektlari o‘rganildi.

O‘rganishda, Andijon viloyatida 18 ta, Jizzax viloyatida 11 ta, Navoiy viloyatida 7 ta tanlov va tenderlarni o‘tkazish jarayonlarida “Davlat xaridlari to‘g‘risida” va “Raqobat to‘g‘risida”gi Qonunlar hamda boshqa qonunosti normativ-huquqiy hujjatlar talablari buzilgani, qurilsh ob’ektlarida davlat budjetiga turli ko‘rinishda 19,6 mlrd. so‘m zararlar yetkazilgani aniqlandi.

O‘rganish natijalariga asosan, prokuratura organlari tomonidan Andijon viloyatida 6 ta, Jizzax viloyatida 3 ta, Navoiy viloyatida 1 ta, jami 10 ta jinoyat ishlari qo‘zg‘atilgan va 2 ta holatda JPKning 84-moddasi 5-qismiga asosan ayblilik masalasi hal qilinmasdan jinoyat ishini qo‘zg‘atishni rad qilish to‘g‘risida qaror qabul qilingan.

Xususan, “Milano Biznes Servise” MCHJ tomonidan qurilish ishlari olib borilgan 2 ta qurilish ob’ektlarida tender (tanlov) o‘tkazish jarayonlari o‘rganilgan va nazorat o‘lchovi o‘tkazilgan.

O‘rganish yakuniga ko‘ra, Qo‘rg‘ontepa tumanida joylashgan umumta’lim maktabi 408 mln. so‘mlik, Jalaquduq tumanida joylashgan “Oyim” ko‘p tarmoqli poliklinikasida 242 mln. so‘mlik ishlar kam bajarilgani aniqlanib, to‘plangan hujjatlar qonuniy baho berish uchun O‘zbekiston Respublikasi Bosh prokuraturasiga yuborilgan va Andijon viloyat prokuraturasi tomonidan “Milano Biznes Servise” MCHJ rahbari “A” va boshqalarga nisbatan JKning 167-moddasi 3-qism “a” bandi va 228-moddasi 2-qismi “b” bandi bilan 2 ta jinoyat ishlari qo‘zg‘atilgan.

Shuningdek, qurilish sohasida qonunbuzilishlarni bartaraf etish yuzasidan Korrupsiyaga qarshi kurashish agentligi tomonidan Andijon viloyat hokimligiga 2021-yil 24-mart kuni taqdimnoma kiritilgan.

Taqdimnoma viloyat hokimligida kengaytirilgan yig‘ilishda ko‘rib chiqilgan bo‘lib, Andijon viloyat “Yagona buyurtmachi xizmati” injiniring kompaniyasining tender (tanlov) o‘tkazish bo‘yicha mas’ul xodimi “B” intizomiy javobgarlikka tortilgan va “Yagona buyurtmachi xizmati” injiniring kompaniyasi direktori N.K., “Qishloq qurilish invest” MCHJ IK Andijon viloyat filiali direktori P.L.lar tender (tanlov) komissiyasi tarkibidan chetlashtirilgan.

Postda  2021-yilning 30-aprelida Andijon viloyati, Buloqboshi tumanida joylashgan 18-sonli umumta’lim maktabini ta’mirlash bo‘yicha o‘tkazilgan tenderda “Milano Biznes Servis” MCHJ g‘olib bo‘lganligi ko‘rsatilgan.

Ushbu tender bo‘yicha Korrupsiyaga qarshi kurashish agentligi tomonidan o‘rganish o‘tkazib, natijasi bo‘yicha to‘liq ma’lumot beriladi.