Мухбир Далиевнинг “facebook”даги ижтимоий тармоғидаги профилида “Қурилишдаги коррупцион омилларга ким барҳам бера олади?” номли мақола чоп этилган. Унда Андижон вилоятида қурилиш соҳасида содир этилаётган қонунбузишларига муносабат билдирилмаётгани танқид қилинган.

Маълумот ўрнида шуни такидлаш лозимки, Коррупцияга қарши курашиш агентлиги томонидан Ҳисоб палатаси ва бошқа вазирлик ҳамда идоралар билан ҳамкорликда қурилиш соҳасида ўрганишлар ўтказилди.

Жумладан, Андижон, Жиззах ва Навоий вилоят ҳокимликларининг “Ягона буюртмачи хизмати” инжиниринг компаниялари ва бошқа буюртмачи ташкилотларида жами 461,3 млрд. сўмлик қийматдаги давлат харидлари юзасидан 59 та қурилиш объектлари ўрганилди.

Ўрганишда, Андижон вилоятида 18 та, Жиззах вилоятида 11 та, Навоий вилоятида 7 та танлов ва тендерларни ўтказиш жараёнларида “Давлат харидлари тўғрисида” ва “Рақобат тўғрисида”ги Қонунлар ҳамда бошқа қонуности норматив-ҳуқуқий ҳужжатлар талаблари бузилгани, қурилш объектларида давлат бюджетига турли кўринишда 19,6 млрд. сўм зарарлар етказилгани аниқланди.

Ўрганиш натижаларига асосан, прокуратура органлари томонидан Андижон вилоятида 6 та, Жиззах вилоятида 3 та, Навоий вилоятида 1 та, жами 10 та жиноят ишлари қўзғатилган ва 2 та ҳолатда ЖПКнинг 84-моддаси 5-қисмига асосан айблилик масаласи ҳал қилинмасдан жиноят ишини қўзғатишни рад қилиш тўғрисида қарор қабул қилинган.

Хусусан, “Milano Biznes Servise” МЧЖ томонидан қурилиш ишлари олиб борилган 2 та қурилиш объектларида тендер (танлов) ўтказиш жараёнлари ўрганилган ва назорат ўлчови ўтказилган.

Ўрганиш якунига кўра, Қўрғонтепа туманида жойлашган умумтаълим мактаби 408 млн. сўмлик, Жалақудуқ туманида жойлашган “Ойим” кўп тармоқли поликлиникасида 242 млн. сўмлик ишлар кам бажарилгани аниқланиб, тўпланган ҳужжатлар қонуний баҳо бериш учун Ўзбекистон Республикаси Бош прокуратурасига юборилган ва Андижон вилоят прокуратураси томонидан “Milano Biznes Servise” МЧЖ раҳбари “А” ва бошқаларга нисбатан ЖКнинг 167-моддаси 3-қисм “а” банди ва 228-моддаси 2-қисми “б” банди билан 2 та жиноят ишлари қўзғатилган.

Шунингдек, қурилиш соҳасида қонунбузилишларни бартараф этиш юзасидан Коррупцияга қарши курашиш агентлиги томонидан Андижон вилоят ҳокимлигига 2021 йил 24 март куни тақдимнома киритилган.

Тақдимнома вилоят ҳокимлигида кенгайтирилган йиғилишда кўриб чиқилган бўлиб, Андижон вилоят “Ягона буюртмачи хизмати” инжиниринг компаниясининг тендер (танлов) ўтказиш бўйича масъул ходими “Б” интизомий жавобгарликка тортилган ва “Ягона буюртмачи хизмати” инжиниринг компанияси директори Н.К., “Қишлоқ қурилиш инвест” МЧЖ ИК Андижон вилоят филиали директори П.Л.лар тендер (танлов) комиссияси таркибидан четлаштирилган.

Постда  2021 йилнинг 30 апрелида Андижон вилояти, Булоқбоши туманида жойлашган 18-сонли умумтаълим мактабини таъмирлаш бўйича ўтказилган тендерда “Milano Biznes Servis” МЧЖ ғолиб бўлганлиги кўрсатилган.

Ушбу тендер бўйича Коррупцияга қарши курашиш агентлиги томонидан ўрганиш ўтказиб, натижаси бўйича тўлиқ маълумот берилади.