Korrupsiyaga qarshi kurashish jarayonlariga keng jamoatchilikni jalb etish, davlat xizmatchilari o‘rtasida halollik standartlarini joriy etish maqsadida Korrupsiyaga qarshi kurashish agentligi tomonidan hududlarda turkum seminarlar tashkil etilmoqda. 
Tadbirlar davomida mamlakatimizda korrupsiyaga qarshi kurashish sohasida olib borilayotgan islohotlar, so‘nggi yangiliklar to‘g‘risida axborot berilmoqda. 
Mazkur seminarlar 25-may kuni Jizzax, Sirdaryo, Toshkent viloyatlari, Qoraqalpog‘iston Respublikasi va Toshkent shahrida tashkil etildi. 
Tadbirlarning navbatdagisi joriy yilning 26-may kuni Farg‘ona viloyatida bo‘lib o‘tdi. Davlat tashkilotlarida korrupsiyaning oqibatlari va unga qarshi kurashish chora-tadbirlari haqida fikr almashilgan seminarda Farg‘ona viloyat hokimligi rahbariyati, agentlik mas’ul xodimlari, viloyatdagi boshqarma va tashkilotlar, muassasa va korxonalar, mahalliy hokimliklar mas’ul xodimlari hamda ommaviy axborot vositalari vakillari qatnashdilar.

Seminarda so‘nggi to‘rt yil davomida mamlakatimizda korrupsion holatlarning oldini olish maqsadida 70 dan ortiq qonun va qonunosti hujjatlari e’lon qilingani, biroq tegishli idoralar bilan hamkorlikda nazorat tadbirlari o‘tkazilib borilayotganiga qaramay, korrupsiya holatlari hamon uchrab turayotgani tanqidiy muhokama qilindi. Xususan, tahlillar ayrim sohalarda korrupsiyaning oldini olish va unga qarshi kurashishda tizimli muammo va kamchiliklar saqlanib qolayotganligini ko‘rsatmoqda.Statistik ma’lumotlarga ko‘ra, 2017 yilda 2.881 nafar, 2018 yilda 1.907 nafar, 2019 yilda 1.339 nafar va 2020 yilda 1.720 nafar mansabdor shaxs korrupsiyaviy jinoyatlari uchun javobgarlikka tortilgan.
Bu esa o‘z navbatida, korrupsiyaga qarshi kurashish samarali mexanizmlarni joriy etishni taqozo etmoqda. Shu boisdan seminar davomida davlat organlari faoliyatida korrupsiya bilan bog‘liq holatlarning oldini olish, unga yo‘l qo‘ymaslik hamda bunday salbiy illatga qarshi samarali kurash olib borish bo‘yicha asosiy vazifalar muhokama qilindi. Bu yo‘nalishda amalga oshirilayotgan ishlar tahlil qilinib, oldinda turgan vazifalar kelishib olindi.