Korrupsiyaga qarshi kurashish agentligi korrupsiyaga qarshi kurashish yo‘nalishida davlat siyosatini amalga oshirishga mas’ul tashkilot etib belgilangan hamda asosiy vazifalaridan biri sifatida davlat idoralari va tashkilotlarida Korrupsiyaga qarshi muvofiqlik «komplayens-nazorat» tizimini joriy etish hisoblanadi. 
O‘tgan davr mobaynida bu borada bir qator ishlar amalga oshirildi. Jumladan, “Yashirin iqtisodiyot hamda korrupsiyaga qarshi muvofiqlik (“komplayens-nazorat”) tizimi”ni joriy etish yuzasidan 26 ta vazirlik va idoralarda joriy etilgan bo‘lsa, joriy yil 1-oktabrdan barcha davlat organlari va tashkilotlari, shu jumladan viloyatlar va Toshkent shahar hokimliklarida korrupsiyaga qarshi ichki nazorat tuzilmalari faoliyatiyo‘lga qo‘yilmoqda. 

Mazkur faoliyat yo‘nalishida samaradorlikni belgilovchi mezonlardan biri bu ISO 37001:2016 “Korrupsiyaga qarshi kurashish menejment tizimi” xalqaro standart sertifikati hisoblanadi. 
Shu boisdan bugungi kunda Korrupsiyaga qarshi kurashish agentligi tomonidan ham korrupsiya holatlarining oldini olish, aniqlash, zarur choralarni ko‘rish hamda korrupsiya xavfini kamaytirishga qaratilgan chora-tadbirlarni nazarda tutuvchi sertifikatni olish borasida ishlar olib borilmoqda. 
Xususan, Korrupsiyaga qarshi kurashish agentligida ISO 37001:2016 «Korrupsiyaga karshi kurashish menejment tizimi» xalqaro standart sertifikatini olish bo‘yicha chora-tadbirlar rejasi tasdiqlandi. Ushbu rejada belgilangan vazifalar doirasida joriy yilning 7 – 11-iyun kunlari Birlashgan Millatlar Tashkiloti Taraqqiyot dasturi ko‘magida ISO 37001:2016 “Korrupsiyaga karshi kurashish menejment tizimi” bo‘yicha maxsus kurslar tashkil etildi. 
Kurslar davomida quyidagi masalalar bo‘yicha ma’ruzalar tinglandi.
- tashkilotlarda korrupsiyaga qarshi kurashish siyosatni shakllantirish;
- korrupsiyaga qarshi menedjment tizimini joriy qilishning asosiy omillari, korrupsiyaviy tavakkallarni baholash;
- korrupsiyani oldini olishga qaratilgan ichki normativlarni ishlab chiqish tartibi;
- manfaatlar to‘qnashuvi hamda sovg‘a olish-berish siyosatini tartibga solish;
- ichki audit tizimining ishini samarali tashkil etish.
Joriy yilning 23-iyun kuni “CERT ACADEMY GROUP” o‘quv markazida o‘quv kursini muvaffaqiyatli tamomlagan agentlik xodimlariga xalqaro sertifikatlar topshirildi.

Tadbir yakunida barcha sohalarda bo‘lgani kabi korrupsiyaga qarshi kurashishda belgilangan vazifalarni sifatli ijrosini ta’minlash mas’ul kadrlarga bog‘lik ekanligi, ularning malakasini muntazam oshirib borish orqali jarayonlarni to‘g‘ri va xolis baholash, masalalarga ilmiy asosda yechim taklif etish kabi ko‘nikmalarni yanada rivojlantirishga xizmat qilishi ta’kidlandi.