Коррупцияга қарши курашиш агентлиги коррупцияга қарши курашиш йўналишида давлат сиёсатини амалга оширишга масъул ташкилот этиб белгиланган ҳамда асосий вазифаларидан бири сифатида давлат идоралари ва ташкилотларида Коррупцияга қарши мувофиқлик «комплаенс-назорат» тизимини жорий этиш ҳисобланади.

Ўтган давр мобайнида бу борада бир қатор ишлар амалга оширилди. Жумладан, “Яширин иқтисодиёт ҳамда коррупцияга қарши мувофиқлик (“комплаенс-назорат”) тизими”ни жорий этиш юзасидан 26 та вазирлик ва идораларда жорий этилган бўлса, жорий йил 1 октябрдан барча давлат органлари ва ташкилотлари, шу жумладан вилоятлар ва Тошкент шаҳар ҳокимликларида коррупцияга қарши ички назорат тузилмалари фаолиятийўлга қўйилмоқда.

Мазкур фаолият йўналишида самарадорликни белгиловчи мезонлардан бири бу ISO 37001:2016 “Коррупцияга қарши курашиш менежмент тизими” халқаро стандарт сертификати ҳисобланади.
 

Шу боисдан бугунги кунда Коррупцияга қарши курашиш агентлиги томонидан ҳам коррупция ҳолатларининг олдини олиш, аниқлаш, зарур чораларни кўриш ҳамда коррупция хавфини камайтиришга қаратилган чора-тадбирларни назарда тутувчи сертификатни олиш борасида ишлар олиб борилмоқда.

Хусусан, Коррупцияга қарши курашиш агентлигида ISO 37001:2016 «Коррупцияга карши курашиш менежмент тизими» халқаро стандарт сертификатини олиш бўйича чора-тадбирлар режаси тасдиқланди. Ушбу режада белгиланган вазифалар доирасида жорий йилнинг 7 – 11 июнь кунлари Бирлашган Миллатлар Ташкилоти Тараққиёт дастури кўмагида ISO 37001:2016 “Коррупцияга карши курашиш менежмент тизими” бўйича махсус курслар ташкил этилди.

Курслар давомида қуйидаги масалалар бўйича маърузалар тингланди.

- ташкилотларда коррупцияга қарши курашиш сиёсатни шакллантириш;

- коррупцияга қарши менеджмент тизимини жорий қилишнинг асосий омиллари, коррупциявий таваккалларни баҳолаш;

- коррупцияни олдини олишга қаратилган ички нормативларни ишлаб чиқиш тартиби;

- манфаатлар тўқнашуви ҳамда совға олиш-бериш сиёсатини тартибга солиш;

- ички аудит тизимининг ишини самарали ташкил этиш.

Жорий йилнинг 23 июнь куни “CERT ACADEMY GROUP” ўқув марказида ўқув курсини муваффақиятли тамомлаган агентлик ходимларига халқаро сертификатлар топширилди.

Тадбир якунида барча соҳаларда бўлгани каби коррупцияга қарши курашишда белгиланган вазифаларни сифатли ижросини таъминлаш масъул кадрларга боғлик эканлиги, уларнинг малакасини мунтазам ошириб бориш орқали жараёнларни тўғри ва холис баҳолаш, масалаларга илмий асосда ечим таклиф этиш каби кўникмаларни янада ривожлантиришга хизмат қилиши таъкидланди.