Korrupsiyaga qarshi kurashish, bu borada olib borilayotgan islohotlarning samaradorligini oshirishda idoralararo hamkorlik muhim vosita hisoblanadi.

Qolaversa, korrupsiyaning oldini olish va unga qarshi kurashish sohasida davlat organlari, ommaviy axborot vositalari, fuqarolik jamiyati institutlari va boshqa nodavlat sektor vakillarining birgalikdagi samarali faoliyatini ta’minlash Korrupsiyaga qarshi kurashish agentligining asosiy vazifalaridan biri etib belgilangan.

Shu munosabat bilan, joriy yilning 9 iyul kuni Agentlik va Maktabgacha ta’lim vazirligi rahbariyati ishtirokida uchrashuv tashkil etildi.

Tadbirda idoralar o‘rtasida kelgusidagi hamkorlik yo‘nalishlari belgilab olinib, vazirlik tizimida mavjud korrupsiyaviy holatlarni bartaraf etish maqsadida o‘zaro hamkorlik Memorandumi imzolandi.

Memorandum doirasida Maktabgacha ta’lim vazirligi tizimida korrupsiyaviy holatlarni aniqlash va ularni bartaraf etish yuzasidan tegishli takliflarni ishlab chiqish nazarda tutilgan.

Shuningdek, mamlakatimizda korrupsiyaga qarshi kurashish va uning oldini olish borasida amalga oshirilayotgan islohotlarda vazirlikning munosib ishtirokini ta’minlash, vazirlikning komplayens-nazorat bo‘limi faoliyatini samarali tashkil etish, xodimlarning malakasini oshirish va boshqa masalalar yuzasidan hamkorlik qilishga kelishib olindi.