Joriy yilning 6-iyun kuni Korrupsiyaga qarshi kurashish agentligi va Huquqni muhofaza qilish akademiyasi o‘rtasida hamkorlik memorandumini imzolashga bag‘ishlangan tadbir bo‘lib o‘tdi.

Aytish joiz, Agentlik Huquqni muhofaza qilish akademiyasi bilan korrupsiyaning oldini olish va unga qarshi kurashishning nazariy va amaliy masalalari, xorijiy tajriba va xalqaro standartlarni o‘rganish, sohaga oid ishlab chiqilgan modullar bo‘yicha o‘quv mashg‘ulotlari va maxsus kurslarga Agentlik xodimlarini jalb etish kabi qator yo‘nalishlarda o‘zaro manfaatli hamkorlik qilib kelmoqda.

Jumladan, O‘zbekiston Respublikasi Prezidentining 2020-yil 29-iyundagi “O‘zbekiston Respublikasida korrupsiyaga qarshi kurashish tizimini takomillashtirish bo‘yicha qo‘shimcha chora-tadbirlar to‘g‘risida”gi PF–6013-son Farmoni talablariga muvofiq, Agentlik xodimlari ishdan ajratilgan holda Akademiyaning taʼlim platformasida maxsus o‘quv dasturlari bo‘yicha malaka oshirmoqda.

Xususan, 2020-2021-yillarda Agentlikning 36 nafar xodimi “Korrupsiyaning oldini olish va unga qarshi kurashish bo‘yicha milliy va xalqaro standartlar hamda xalqaro tajriba” mavzusidagi malaka oshirish kurslarida o‘z bilim va ko‘nikmalarini yanada boyitdi. Agentlik xodimlari, shuningdek, Bosh prokuratura tomonidan tashkil etilgan “Korrupsiyaga oid jinoyatlarni tergov qilish amaliyoti va xorijiy mamlakatlar tajribasi” mavzusidagi malaka oshirish kurslarida ham faol ishtirok etdi.

Mazkur memorandumning imzolanishi esa o‘rnatilgan hamkorlik aloqalarini yangi bosqichga olib chiqishga xizmat qilishi bilan yanada ahamiyatlidir.

Ushbu Memorandum orqali korrupsiyaning oldini olish hamda unga qarshi kurashish sohasida ilmiy va amaliy tadqiqotlar olib borish, korrupsiya holatining tizimli tahlilini hamkorlikda amalga oshirish, shuningdek, korrupsiyaga oid xavf-xatarlar yuqori bo‘lgan sohalar hamda korrupsiyaga oid huquqbuzarliklar sodir etilishining sabab va shart-sharoitlarini birgalikda aniqlash kabi muhim maqsadlar ko‘zda tutilgan.

Jumladan, mazkur hujjat ikki tomonlama aloqalarni yana-da mustahkamlash, Agentlik xodimlari, korrupsiyaga qarshi ichki nazorat tizimi masʼul xodimlarining salohiyati va malakasini oshirishga qaratilgan seminar-treninglar, o‘quv dasturlar, malaka oshirish kurslarini tashkil etish, korrupsiyaga qarshi kurashish sohasida taʼlim dasturlarini ishlab chiqish va takomillashtirish, davlat organlari va boshqa tashkilotlar xizmatchilari uchun korrupsiyaning oldini olish bo‘yicha o‘qitish va bilimini baholab borish tizimini yo‘lga qo‘yish va shu kabi qo‘shma tadbirlarni qamrab oladi.

Memorandum doirasida, shuningdek, quyidagi vazifalarni hamkorlikda amalga oshirish belgilangan:

- normativ-huquqiy hujjatlar loyihalari va amalda qonunchilik hujjatlarini korrupsiyaga qarshi ekspertizadan o‘tkazishda hamkorlik qilish;

- korrupsiyaga qarshi kurashish xalqaro standartlarini O‘zbekiston Respublikasi qonunchiligiga implementatsiya qilishni davom ettirishga qaratilgan yo‘l xaritalarni amalga oshirish bo‘yicha tadbirlar tashkil etish;

- Iqtisodiy hamkorlik va taraqqiyot tashkiloti (IHTT) Korrupsiyaga qarshi kurashish tarmog‘ining Istanbul harakatlar rejasi tavsiyalarini milliy qonun normalari va huquqni qo‘llash amaliyotiga joriy qilishga qaratilgan tadbirlarni amalga oshirish;

- korrupsiyaga qarshi kurashish sohasida xalqaro reyting va indekslarda O‘zbekiston o‘rnini yaxshilashga qaratilgan tadbirlarni amalga oshirish v.b.

Tadbir davomida memorandumdagi shu va boshqa vazifalar atroflicha muhokama qilinib, ularning ijrosini to‘liq taʼminlash maqsadida chora-tadbirlar rejasi imzolandi.

Korrupsiyaga qarshi kurashish agentligi

Axborot xizmati