Жорий йилнинг 6 июнь куни Коррупцияга қарши курашиш агентлиги ва Ҳуқуқни муҳофаза қилиш академияси ўртасида ҳамкорлик меморандумини имзолашга бағишланган тадбир бўлиб ўтди.

Айтиш жоиз, Агентлик Ҳуқуқни муҳофаза қилиш академияси билан коррупциянинг олдини олиш ва унга қарши курашишнинг назарий ва амалий масалалари, хорижий тажриба ва халқаро стандартларни ўрганиш, соҳага оид ишлаб чиқилган модуллар бўйича ўқув машғулотлари ва махсус курсларга Агентлик ходимларини жалб этиш каби қатор йўналишларда ўзаро манфаатли ҳамкорлик қилиб келмоқда.

Жумладан, Ўзбекистон Республикаси Президентининг 2020 йил 29 июндаги “Ўзбекистон Республикасида коррупцияга қарши курашиш тизимини такомиллаштириш бўйича қўшимча чора-тадбирлар тўғрисида”ги ПФ–6013-сон Фармони талабларига мувофиқ, Агентлик ходимлари ишдан ажратилган ҳолда Академиянинг таълим платформасида махсус ўқув дастурлари бўйича малака оширмоқда.

Хусусан, 2020-2021 йилларда Агентликнинг 36 нафар ходими “Коррупциянинг олдини олиш ва унга қарши курашиш бўйича миллий ва халқаро стандартлар ҳамда халқаро тажриба” мавзусидаги малака ошириш курсларида ўз билим ва кўникмаларини янада бойитди. Агентлик ходимлари, шунингдек, Бош прокуратура томонидан ташкил этилган “Коррупцияга оид жиноятларни тергов қилиш амалиёти ва хорижий мамлакатлар тажрибаси” мавзусидаги малака ошириш курсларида ҳам фаол иштирок этди.

Мазкур меморандумнинг имзоланиши эса ўрнатилган ҳамкорлик алоқаларини янги босқичга олиб чиқишга хизмат қилиши билан янада аҳамиятлидир.

Ушбу Меморандум орқали коррупциянинг олдини олиш ҳамда унга қарши курашиш соҳасида илмий ва амалий тадқиқотлар олиб бориш, коррупция ҳолатининг тизимли таҳлилини ҳамкорликда амалга ошириш, шунингдек, коррупцияга оид хавф-хатарлар юқори бўлган соҳалар ҳамда коррупцияга оид ҳуқуқбузарликлар содир этилишининг сабаб ва шарт-шароитларини биргаликда аниқлаш каби муҳим мақсадлар кўзда тутилган.

Жумладан, мазкур ҳужжат икки томонлама алоқаларни янада мустаҳкамлаш, Агентлик ходимлари, коррупцияга қарши ички назорат тизими масъул ходимларининг салоҳияти ва малакасини оширишга қаратилган семинар-тренинглар, ўқув дастурлар, малака ошириш курсларини ташкил этиш, коррупцияга қарши курашиш соҳасида таълим дастурларини ишлаб чиқиш ва такомиллаштириш, давлат органлари ва бошқа ташкилотлар хизматчилари учун коррупциянинг олдини олиш бўйича ўқитиш ва билимини баҳолаб бориш тизимини йўлга қўйиш ва шу каби қўшма тадбирларни қамраб олади.

Меморандум доирасида, шунингдек, қуйидаги вазифаларни ҳамкорликда амалга ошириш белгиланган:

- норматив-ҳуқуқий ҳужжатлар лойиҳалари ва амалда қонунчилик ҳужжатларини коррупцияга қарши экспертизадан ўтказишда ҳамкорлик қилиш;

- коррупцияга қарши курашиш халқаро стандартларини Ўзбекистон Республикаси қонунчилигига имплементация қилишни давом эттиришга қаратилган йўл хариталарни амалга ошириш бўйича тадбирлар ташкил этиш;

- Иқтисодий ҳамкорлик ва тараққиёт ташкилоти (ИҲТТ) Коррупцияга қарши курашиш тармоғининг Истанбул ҳаракатлар режаси тавсияларини миллий қонун нормалари ва ҳуқуқни қўллаш амалиётига жорий қилишга қаратилган тадбирларни амалга ошириш;

- коррупцияга қарши курашиш соҳасида халқаро рейтинг ва индексларда Ўзбекистон ўрнини яхшилашга қаратилган тадбирларни амалга ошириш в.б.

Тадбир давомида меморандумдаги шу ва бошқа вазифалар атрофлича муҳокама қилиниб, уларнинг ижросини тўлиқ таъминлаш мақсадида чора-тадбирлар режаси имзоланди.

Коррупцияга қарши курашиш агентлиги

Ахборот хизмати