Navoiy viloyati Korrupsiyaga qarshi kurashish hududiy kengashining joriy yil 27-sentabr  kuni bo‘lib o‘tgan navbatdagi yig‘ilishida  Korrupsiyaga qarshi kurashish agentligi vakillarining viloyatdagi ikki kunlik o‘rganishlari yakunlari hamda hududiy kengashining 2023-yildagi faoliyati samaradorligi, shuningdek, viloyatda korrupsiyaga oid jinoyatchilik holati, kelib chiqish sabablari va ularni bartaraf etish uchun ko‘rilayotgan profilaktik choralar atroflicha muhokama qilindi.

Maʼlumot uchun: Korrupsiyaga qarshi kurashish agentligi direktori boshchiligidagi ishchi guruh vakillari 26-27-sentabr kunlari davomida Navoiy viloyatida o‘rganishlar olib borildi. Unda oliy taʼlim va sog‘liqni saqlash tizimidagi “Korrupsiyasiz soha” loyihalarining viloyatdagi ijrosi doirasida Navoiy davlat pedagogika universiteti hamda viloyat respublika shoshilinch tez tibbiy yordam markazining viloyat filiali, “Hududgaz Navoiy” filiali, “Qishloq joylarini barqaror rivojlantirish” loyihasi bo‘yicha Navbahor tumanida amalga oshirilayotgan loyihalarga ajratilgan mablag‘larning maqsadli sarflanishi, bu jarayonda ochiqlikni taʼminlash holatlari o‘rganildi.

Yig‘ilishda Korrupsiyaga qarshi kurashish agentligi direktori A.Burxanov dastlab o‘rganish yakunlari hamda korrupsiyaga qarshi kurashish bo‘yicha amalga oshirilayotgan ishlarni baholashga qaratilgan reytinglarda viloyatning ko‘rsatkichlariga alohida to‘xtalib o‘tdi.

Taʼkidlanganidek, viloyat Agentlik tomonidan har chorakda yuritiladigan Hududlar kesimida korrupsiya tarqalganlik darajasi reytingi bo‘yicha Respublikada 13-o‘rin bilan korrupsiya darajasi past bo‘lgan “yashil” hududlar toifasiga kiritilgan. Ammo Korrupsiyaga qarshi kurashish ishlarining samaradorligi reytingida, Davlat organlari va tashkilotlari faoliyatining ochiqlik indeksida, Korrupsiyaga qarshi kurashish hududiy kengash faoliyati reytingida  viloyat ko‘rsatkichlari “qoniqarsiz” yoki pastki o‘rinlarni egallamoqda.

Bundan tashqari, viloyatda 2023-yilning o‘tgan 8 oyida jami 85 ta korrupsiyaga oid jinoyat ishi qo‘zg‘atilib, shundan 129 nafar shaxsga nisbatan jazo muqarrarligi taʼminlangan. 52 nafar turli darajadagi mansabdor shaxs korrupsion jinoyat sodir etganligi uchun jinoiy javobgarlikka tortilgan.

Bu kabi natijalar viloyatda korrupsiyaga qarshi kurashish borasidagi ishlarni yanada kuchaytirish hamda mansabdor shaxslarning bu boradagi masʼuliyatini oshirishni  talab qilmoqda.

Yana bir muhim  masala — viloyatda davlat organlari va tashkilotlari faoliyatining ochiqligini taʼminlashning bugungi kundagi holatiga jiddiy eʼtibor qaratildi.

Xususan, Ochiqlik indeksida Navoiy viloyati hokimligi “sariq”toifada qayd etilgani bois hokimlikning ochiqlikni taʼminlash sohasidagi faoliyatini yana-da takomillashtirish hamda ijobiy tajribalarni ommalashtirish bo‘yicha Agentlik tomonidan ishlab chiqilgan tavsiyalar amalda ijobiy samara berayotganiga alohida urg‘u berildi.

Yig‘ilish mobaynida, shuningdek, viloyatdagi davlat tashkilotlari tomonidan davlat xaridlari to‘g‘risidagi qonunchilik talablarini buzish holatlari,  viloyat va tuman-shahar hokimligi ayrim mansabdor shaxslarining tadbirkorlik faoliyati bilan shug‘ullanib kelayotganligi kabi sustkashlik va masʼuliyatsizliklar keskin tanqid qilinib, mazkur masalani hududiy Kengash yig‘ilishida tanqidiy muhokama qilish, o‘z vazifasini lozim darajada bajarmagan masʼullarning javobgarligi masalasini ko‘rib chiqish lozimligi qayd etildi.

Korrupsiyaga qarshi kurashish hududiy kengashi faoliyatini samarali tashkil qilishdagi mavjud muammolar va ularni bartaraf etish choralari ham yig‘ilish ishtirokchilarining eʼtibor markazida bo‘ldi.

Xususan, Kengash o‘z faoliyatida monitoring va nazorat tadbirlarini  o‘tkazish, eshituvlar tashkil etish kabi instrumentlardan samarali foydalanishi lozimligi alohida taʼkidlandi.

Bundan tashqari, nodavlat notijorat tashkilotlari, ommaviy axborot vositalari bilan o‘zaro hamkorlikni mustahkamlash orqali korrupsiyaga qarshi kurashish jarayoniga aholini keng jalb etish ishlarini yana-da kuchaytirish zarurligi bildirildi.

Yig‘ilishda mazkur masalalar yuzasidan viloyat prokurori, hududiy kengash kotibi va boshqa masʼullarning axboroti tinglandi.

Shuningdek, yig‘ilishda hududiy kengash raisi tomonidan hududda korrupsiyaga qarshi kurashish va oldini olish borasidagi jarayonlarni yaxshilash, bu borada Agentlik, Hududiy kengash, fuqarolik jamiyati institutlari hamda deputatlik korpusi vakillari bilan birgalikda monitoring tadbirlarini va eshituvlarini tashkil etish tashabbusini ilgari surdi. Bunda hududdagi korrupsiya holatlari yuqori bo‘lgan sohalar va tuman shaharlardagi korrupsiya holatlari va oldini olish bo‘yicha ko‘rilayotgan choralar tizimli ravishda Hududiy kengash yig‘ilishida muhokama qilib boriladi. 

Yuqoridagilardan kelib chiqib, viloyatda korrupsiyaga qarshi kurashish tizimini tubdan qayta ko‘rib chiqish, bu borada ayniqsa, hududiy Kengash faolligini oshirish, uning aʼzolari masʼuliyatini kuchaytirish yuzasidan bir qator aniq maqsad va vazifalar belgilab  olindi.

Korrupsiyaga qarshi kurashish agentligi

Axborot xizmati