Навоий вилояти Коррупцияга қарши курашиш ҳудудий кенгашининг жорий йил 27 сентябрь  куни бўлиб ўтган навбатдаги йиғилишида  Коррупцияга қарши курашиш агентлиги вакилларининг вилоятдаги икки кунлик ўрганишлари якунлари ҳамда ҳудудий кенгашининг 2023 йилдаги фаолияти самарадорлиги, шунингдек, вилоятда коррупцияга оид жиноятчилик ҳолати, келиб чиқиш сабаблари ва уларни бартараф этиш учун кўрилаётган профилактик чоралар атрофлича муҳокама қилинди.

Маълумот учун: Коррупцияга қарши курашиш агентлиги директори бошчилигидаги ишчи гуруҳ вакиллари 26-27 сентябрь кунлари давомида Навоий вилоятида ўрганишлар олиб борилди. Унда олий таълим ва соғлиқни сақлаш тизимидаги “Коррупциясиз соҳа” лойиҳаларининг вилоятдаги ижроси доирасида Навоий давлат педагогика университети ҳамда вилоят республика шошилинч тез тиббий ёрдам марказининг вилоят филиали, “Ҳудудгаз Навоий” филиали, “Қишлоқ жойларини барқарор ривожлантириш” лойиҳаси бўйича Навбаҳор туманида амалга оширилаётган лойиҳаларга ажратилган маблағларнинг мақсадли сарфланиши, бу жараёнда очиқликни таъминлаш ҳолатлари ўрганилди.

Йиғилишда Коррупцияга қарши курашиш агентлиги директори А.Бурханов дастлаб ўрганиш якунлари ҳамда коррупцияга қарши курашиш бўйича амалга оширилаётган ишларни баҳолашга қаратилган рейтингларда вилоятнинг кўрсаткичларига алоҳида тўхталиб ўтди.

Таъкидланганидек, вилоят Агентлик томонидан ҳар чоракда юритиладиган Ҳудудлар кесимида коррупция тарқалганлик даражаси рейтинги бўйича Республикада 13-ўрин билан коррупция даражаси паст бўлган «яшил» ҳудудлар тоифасига киритилган. Аммо Коррупцияга қарши курашиш ишларининг самарадорлиги рейтингида, Давлат органлари ва ташкилотлари фаолиятининг очиқлик индексида, Коррупцияга қарши курашиш ҳудудий кенгаш фаолияти рейтингида  вилоят кўрсаткичлари «қониқарсиз» ёки пастки ўринларни эгалламоқда.

Бундан ташқари, вилоятда 2023 йилнинг ўтган 8 ойида жами 85 та коррупцияга оид жиноят иши қўзғатилиб, шундан 129 нафар шахсга нисбатан жазо муқаррарлиги таъминланган. 52 нафар турли даражадаги мансабдор шахс коррупцион жиноят содир этганлиги учун жиноий жавобгарликка тортилган.

Бу каби натижалар вилоятда коррупцияга қарши курашиш борасидаги ишларни янада кучайтириш ҳамда мансабдор шахсларнинг бу борадаги масъулиятини оширишни  талаб қилмоқда.

Яна бир муҳим  масала — вилоятда давлат органлари ва ташкилотлари фаолиятининг очиқлигини таъминлашнинг бугунги кундаги ҳолатига жиддий эътибор қаратилди.

Хусусан, Очиқлик индексида Навоий вилояти ҳокимлиги «сариқ»тоифада қайд этилгани боис ҳокимликнинг очиқликни таъминлаш соҳасидаги фаолиятини янада такомиллаштириш ҳамда ижобий тажрибаларни оммалаштириш бўйича Агентлик томонидан ишлаб чиқилган тавсиялар амалда ижобий самара бераётганига алоҳида урғу берилди.

Йиғилиш мобайнида, шунингдек, вилоятдаги давлат ташкилотлари томонидан давлат харидлари тўғрисидаги қонунчилик талабларини бузиш ҳолатлари,  вилоят ва туман-шаҳар ҳокимлиги айрим мансабдор шахсларининг тадбиркорлик фаолияти билан шуғулланиб келаётганлиги каби сусткашлик ва масъулиятсизликлар кескин танқид қилиниб, мазкур масалани ҳудудий Кенгаш йиғилишида танқидий муҳокама қилиш, ўз вазифасини лозим даражада бажармаган масъулларнинг жавобгарлиги масаласини кўриб чиқиш лозимлиги қайд этилди.

Коррупцияга қарши курашиш ҳудудий кенгаши фаолиятини самарали ташкил қилишдаги мавжуд муаммолар ва уларни бартараф этиш чоралари ҳам йиғилиш иштирокчиларининг эътибор марказида бўлди.

Хусусан, Кенгаш ўз фаолиятида мониторинг ва назорат тадбирларини  ўтказиш, эшитувлар ташкил этиш каби инструментлардан самарали фойдаланиши лозимлиги алоҳида таъкидланди.

Бундан ташқари, нодавлат нотижорат ташкилотлари, оммавий ахборот воситалари билан ўзаро ҳамкорликни мустаҳкамлаш орқали коррупцияга қарши курашиш жараёнига аҳолини кенг жалб этиш ишларини янада кучайтириш зарурлиги билдирилди.

Йиғилишда мазкур масалалар юзасидан вилоят прокурори, ҳудудий кенгаш котиби ва бошқа масъулларнинг ахбороти тингланди.

Шунингдек, йиғилишда ҳудудий кенгаш раиси томонидан ҳудудда коррупцияга қарши курашиш ва олдини олиш борасидаги жараёнларни яхшилаш, бу борада Агентлик, Ҳудудий кенгаш, фуқаролик жамияти институтлари ҳамда депутатлик корпуси вакиллари билан биргаликда мониторинг тадбирларини ва эшитувларини ташкил этиш ташаббусини илгари сурди. Бунда ҳудуддаги коррупция ҳолатлари юқори бўлган соҳалар ва туман шаҳарлардаги коррупция ҳолатлари ва олдини олиш бўйича кўрилаётган чоралар тизимли равишда Ҳудудий кенгаш йиғилишида муҳокама қилиб борилади. 

Юқоридагилардан келиб чиқиб, вилоятда коррупцияга қарши курашиш тизимини тубдан қайта кўриб чиқиш, бу борада айниқса, ҳудудий Кенгаш фаоллигини ошириш, унинг аъзолари масъулиятини кучайтириш юзасидан бир қатор аниқ мақсад ва вазифалар белгилаб  олинди.

Коррупцияга қарши курашиш агентлиги
Ахборот хизмати