2020 йилнинг 28 декабрь куни Ўзбекистон Республикаси Президентининг “2021-2023 йилларда Ўзбекистон Республикасининг ижтимоий ва ишлаб чиқариш инфратузилмасини ривожлантириш чора-тадбирлари тўғрисида”ги қарори қабул қилинди.

Қарор билан республикада тадбиркорлик субъектларига қулай инвестиция муҳитини яратиш, шунингдек, аҳоли бандлигини таъминлаш ва уларнинг турмуш даражасини янада яхшилаш мақсадида 2021-2023 йилларда 59 триллион 870 млрд сўмлик ижтимоий ва ишлаб чиқариш инфратузилмаси объектларини барпо этиш белгиланмоқда.

Мазкур қарорда Коррупцияга қарши курашиш агентлигига Ҳисоб палатаси билан биргаликда икки ой муддатда бюджет маблағлари ҳисобидан капитал қўйилмаларни мақсадли ва самарали ўзлаштириш ҳамда лойиҳалар (объектлар) натижадорлигини таъминлашга қаратилган коррупцияга қарши назорат тизимини жорий этиш вазифаси қўйилди. Бунда:

• лойиҳа ташаббускорлари томонидан бюджет маблағларидан фойдаланишда коррупцияга қарши курашиш механизмларини ишлаб чиқиш ва амалиётга татбиқ этиш;
• молия ва инвестиция соҳаларида мувофиқлик тизими (комплаенс) ҳамда коррупцияга қарши курашишнинг бошқа самарали воситаларини жорий этиш;
• лойиҳа ва пудрат ишлари (хизматлари) хариди жараёнларининг шаффофлигини таъминлаш, ушбу соҳада “Шаффоф қурилиш” миллий ахборот тизимидан, шу жумладан электрон тендер платформасидан тизимли фойдаланишни ташкил этиш;
• аниқланган камчиликлар юзасидан ҳар чоракда Олий Мажлис палаталарига ва Ўзбекистон Республикаси Президенти Администрациясига белгиланган тартибда хулосалар киритиб бориш назарда тутилиши лозим.

Коррупцияга қарши курашиш агентлиги томонидан мазкур вазифалар ижросини таъминлаш бўйича тегишли чора-тадбирлар амалга оширилади.