Норматив-ҳуқуқий ҳужжатлар лойиҳаларини ишлаб чиқиш жараёнида улардаги коррупциявий омилларни аниқлаш ва бартараф этиш мақсадида коррупцияга қарши экспертиза ўтказилади.

Аввал хабар берганимиздек, Агентлик томонидан “Норматив-ҳуқуқий ҳужжатлар ва уларнинг лойиҳаларини коррупцияга қарши экспертизаси тўғрисида”ги қонун лойиҳаси ишлаб чиқилиб, жамоатчилик муҳокамасига жойлаштирилган эди.

Мазкур қонун лойиҳасига кўра, антикоррупцион экспертиза субъектлари сифатида Коррупцияга қарши курашиш агентлиги, Адлия вазирлиги, бошқа вазирлик ва идораларнинг юридик хизматлари белгиланиши кўзда тутилмоқда.
 

Шу боис, жорий йилнинг 28 июнь куни Агентлик томонидан БМТнинг Гиёҳванд моддалар ва жиноятчилик бўйича бошқармасининг Марказий Осиёдаги ваколатхонаси ҳамкорлигида вазирлик ва давлат идоралари масъул ходимларининг билим ва кўникмаларини ошириш мақсадида “Норматив-ҳуқуқий ҳужжатлар ва уларнинг лойиҳаларини коррупцига қарши экспертизадан ўтказиш” мавзусида онлайн тренинг ташкил этилди.

Тренинг БМТ ГЖБнинг коррупцияга қарши курашиш бўйича Миллий Дастур офицери ва Россия Фанлар академияси Давлат ва ҳуқуқ институти профессори, эксперт Э.Талапина томонидан ўтказилди.
 

Тренинг давомида коррупцияга қарши курашиш бўйича чора-тадбирлар контекстида коррупцияга қарши экспертизанинг аҳамияти, экспертиза суъектларининг вазифа ва функциялари ҳамда бу борадаги илғор хорижий давлатлар тажрибаси муҳокама этилди.

Тадбир якунида иштирокчилар ўртасида коррупцияга қарши экспертизадан ўтказиш бўйича ҳамкорликни давом эттиришга, шу жумладан кейинги босқичда экспертизанинг амалий жиҳатлари бўйича муҳокамалар ташкил этишга келишиб олинди.