Жорий йилнинг 9 ноябрь куни Коррупцияга қарши курашиш миллий кенгашининг навбатдаги йиғилиши бўлиб ўтди.

Унда Коррупцияга қарши курашиш миллий кенгаши аъзолари, сенаторлар, вазирлик ва идоралар раҳбарлари иштирок этди.

Йиғилишда олий таълим ҳамда қурилиш тизимларидаги “Коррупциясиз соҳа” лойиҳалари доирасида амалга оширилган ишлар, Коррупцияга қарши курашиш бўйича 2021-2022 йилларга мўлжалланган Давлат дастури ижроси ҳамда ҳудудий кенгашлар фаолиятини такомиллаштиришга оид масалалар муҳокама қилинди.

Дастлаб, Миллий кенгаш аъзолари томонидан олий таълим соҳасида “Коррупциясиз соҳа” лойиҳасини амалга ошириш ҳолати таҳлил қилинди. Бу борада Олий ва ўрта махсус таълим вазирининг ахбороти тингланди.

Таъкидланганидек, сўнгги беш йилда олий таълимни ривожлантиришга қаратилган 200 дан ортиқ қонун ҳужжатлари қабул қилинди, қабул квоталари 66 мингтадан 181 мингтага оширилди, абитуриентларга бир вақтнинг ўзида 5 тагача олий таълим муассасаси танловларида иштирок этиш имконияти яратилди, соҳадаги бир қатор хизматлар рақамлаштирилди.

Тест жараёнлари, касбий (ижодий), магистратурага кириш имтиҳон жараёнлари тегишли платформаларда онлайн эфирга узатилмоқда.

Йиғилишда кенгаш аъзолари томонидан бу борада белгиланган бир қатор вазифаларнинг ижроси таъминланмагани ҳам танқид қилинди.

Шундан сўнг Миллий кенгаш аъзолари Капитал қурилиш соҳасида “коррупциясиз соҳа” лойиҳасини амалга ошириш ҳолатини муҳокама қилишди.

Эътироф этилганидек, қурилиш объектларини назорат қилиш жараёнларида коррупциявий омилларни камайтириш ва ушбу жараёнларнинг шаффофлигини таъминлаш мақсадида “Шаффоф қурилиш” миллий ахборот тизими ва унинг “Қурилишдаги назорат” қуйи тизими ишлаб чиқилиб, 2021 йилдан реал вақт режимида бутун республикада жорий қилинган. Бундан ташқари, қишлоқ хўжалигига мўлжалланмаган бўш турган ер участкаларини тадбиркорлик ва шаҳарсозлик фаолиятини амалга ошириш учун фақат “E-IJRO AUKSION” савдо майдончасида электрон онлайн-аукцион орқали берилиши йўлга қўйилган. Қурилиш вазирлиги таркибида комплаенс-назорат ва коррупцияга қарши курашиш бўлими ташкил этилди. Ушбу йўналишда белгиланган вазифаларнинг ижроси юзасидан Қурилиш вазирининг ахбороти эшитилди.

Кенгаш аъзолари томонидан ҳар иккала соҳада ҳам бажарилмаган вазифаларнинг ижросини тўлиқ таъминлаш, бу борада масъул раҳбарларнинг масъулиятини янада ошириш лозимлиги қайд этилди.

Йиғилишда шунингдек, Коррупцияга қарши курашиш бўйича 2021-2022 йилларга мўлжалланган Давлат дастури ижроси ҳам муҳокама қилинди. Хусусан, Давлат дастурида коррупцияга қарши курашиш механизмларини такомиллаштириш, манфаатлар тўқнашувининг олдини олиш, коррупцияга қарши курашиш тузилмалари фаолиятини такомиллаштириш, коррупцияга қарши курашиш бўйича халқаро стандартларни жорий қилишга доир белгиланган бир қатор вазифаларнинг ижро ҳолати таҳлил қилинди.

Жумладан, «Коррупциядан ҳоли қонунчилик» тамойили асосида қонунчилик ҳужжатлари ва уларнинг лойиҳаларини коррупцияга қарши экспертизадан ўтказиш тартибини янада такомиллаштириш мақсадида 2021 йил 22 октябрда Ўзбекистон Республикаси Президентининг “Норматив-ҳуқуқий ҳужжатлар ва уларнинг лойиҳаларини коррупцияга қарши экспертизадан ўтказишни янада такомиллаштириш чора-тадбирлари тўғрисида”ги Қарори қабул қилинди.

Мазкур қарор билан эндиликда, амалдаги норматив-ҳуқуқий ҳужжатлар босқичма-босқич коррупцияга қарши экспертизадан ўтказилади. Шунингдек, 2022 йил 1 январдан бошлаб илмий ташкилотлар ва олий таълим муассасалари вакиллари ҳамда жисмоний шахсларга — мустақил экспертларга норматив-ҳуқуқий ҳужжатлар ва уларнинг лойиҳаларини коррупцияга қарши илмий ва мустақил экспертизадан ўтказиш ҳуқуқи берилади. Кенгаш аъзолари мазкур қарорда жамоатчилик ҳамда илмий доира вакилларининг ҳам алоҳида ўрни белгилангани қонун ижодкорлиги ҳамда коррупцияга қарши курашиш жараёнларига халқ вакилларининг иштирокини янада кенгайтиришга хизмат қилишини эътироф этишди.

Шу билан бирга, коррупцияга қарши самарали превентив чора сифатида ички назорат тузилмаларини ташкил этиш белгиланган эди. Бугунги кунга қадар 102 та республика даражасидаги давлат органлари ва хўжалик ташкилотларида ҳамда 13 та маҳаллий давлат ҳокимияти органларида коррупцияга қарши ички назорат тузилмалари фаолияти йўлга қўйилди.

Шу билан бирга, йиғилишда ҳудудий кенгашлар фаолиятини янада жонлантириш масаласи муҳокама этилди. Бу борада уларнинг фаолиятини баҳолаб бориш ва ташаббусларини муносиб рағбатлантириб бориш мақсадида ҳудудий кенгашлар фаолиятини баҳолаб боришга мўлжалланган рейтинг кўрсаткичлари ва услубиёти қабул қилинди.

Бундан ташқари, йиғилишда “9 декабрь – Халқаро коррупцияга қарши кураш куни”ни юқори савияда ташкил этиш, ушбу жараёнда ҳудудлар ҳам фаол иштирок этиши лозимлиги қайд этилди.

Йиғилиш якунида барча масалалар юзасидан тегишли қарорлар қабул қилинди.