Бирлашган Миллатлар Ташкилотининг тегишли қарорига асосан 9 декабрь – Халқаро коррупцияга қарши курашиш куни сифатида нишонланиб келинади. 2004 йилдан буён ушбу сана муносабати билан бутунжаҳон миқёсида коррупцияга қарши курашиш бўйича тадбирлар амалга оширилади.

Жумладан, кейинги йилларда юртимизда ҳам коррупцияга қарши курашиш ва унинг олдини олиш бўйича амалга оширилаётган ишлар сарҳисобига бағишланган тадбирлар ўтказиб келинмоқда. Бу йил мазкур санани юқори савияда ўтказиш ва қамров даражасини ошириш мақсад қилинган.

Ўзбекистон Республикаси Коррупцияга қарши курашиш Миллий кенгаши, Коррупцияга қарши курашиш агентлиги, тегишли вазирлик ва идоралар ҳамда қатор халқаро ташкилотлар билан ҳамкорликда жорий йилнинг ноябрь–декабрь ойлари давомида Коррупцияга қарши курашиш ҳафталиги ташкил этилади. Тадбирлар доирасида давлат органлари ва ташкилотлари, ННТлар, ОАВ вакиллари, журналист ва блогерлар иштирокида муҳокама ва анжуманлар, ёшлар иштирокида тренинг ва ўқув дарслари, кенг аҳоли қатлами ўртасида жамоатчилик фикри сўровлари ўтказилади. 

Эътиборлиси, коррупцияга қарши курашиш масаласига бағишланган “Ёшлар пресс-клуби”, “Халқаро пресс-клуб”нинг махсус сонларини тасвирга олиш, қатор давлат органлари ва ташкилотларида қизиқиш билдирган фуқаролар иштирокида “Очиқ эшиклар куни” ташкил этиш режалаштирилган.

Ҳафталик доирасида илк бор тадбиркорлар иштирокида бизнес юритишга тўсқинлик қилувчи коррупциявий омиллар муҳокамасига бағишланган форум ҳамда халқаро экспертлар билан биргаликда очиқлик ва коррупцияга қарши курашишнинг долзарб масалалари юзасидан Тошкент форуми бўлиб ўтади.

Шунингдек, Коррупцияга қарши курашиш миллий кенгаши, Коррупцияга қарши курашиш агентлиги, Адлия вазирлиги, Бош прокуратура ва қатор халқаро ташкилотлар томонидан эълон қилинган “Коррупцияни биргаликда енгамиз!”  танлови ғолиблари ҳам мазкур ҳафталик доирасида тантанали тақдирланади.

Ҳафталик дастури ва бошқа қўшимча маълумотлар Агентлик расмий веб-сайти ва ижтимоий тармоқлардаги саҳифалари орқали мунтазам эълон қилиб борилади.