Ўзбекистон Республикаси Президентининг 2020 йил 29 июндаги “Ўзбекистон Республикасида коррупцияга қарши курашиш тизимини такомиллаштириш бўйича қўшимча чора-тадбирлар тўғрисида” 6013-сонли Фармонига асосан Коррупцияга қарши курашиш агентлигига давлат харидлари соҳасида коррупцияга қарши назорат тизимининг самарадорлигини таҳлил қилиш ва ушбу фаолиятни такомиллаштириш вазифаси юклатилган.

Мазкур топшириқ ижросини таъминлаш мақсадида Агентлик томонидан мунтазам манзилли ва масофавий ўрганишлар ҳамда мониторинглар ўтказиб келинмоқда.

Жумладан, Агентлик томонидан ўтган давр мобайнида давлат харидлари соҳасида 24 та манзилли ўрганишлар ўтказилди ва доимий масофавий мониторинглар амалга оширилди.

Ўрганишлар якуни бўйича жиноят иши қўзғатиш масаласини ҳал этиш учун хуқуқни мухофаза қилиш органлари томонидан жами 60 га яқин сўровномалар киритилган бўлиб, ушбу сўровномалар бўйича 44 та жиноят ишлари ва 24 та маъмурий ишлар қўзғатилиши таъминланди.

Мазкур қўзғатилган жиноят ишларининг 21 таси, маъмурий ишларнинг 24 таси давлат харидлари соҳасига тааллуқли хисобланади.

Ҳудудлар кесимида Андижон вилоятида 6 та, Тошкент шаҳрида 4 та, Жиззах вилоятида 4 та, Қашқадарё вилоятида 3 та, Наманган вилоятида 1 та, Тошкент вилоятида 1 та, Навоий вилоятида 1 та, Самарқанд вилоятида 1 та,  жиноятлар содир этилган.

Соҳалар кесимида ўрганилганда, қурилиш соҳасида 11 та, соғлиқни сақлаш соҳасида 4 та, таълим соҳасида 2 та, спорт соҳасида 2 та, маданият соҳасида 2 та жиноятлар содир этилгани аниқланди.

Содир этилган жиноятларнинг 2 таси республика, 16 таси вилоят, 3 таси туман-шаҳар ташкилотлари ҳисобига тўғри келмоқда.

Бугунги кунда 18 нафар шахсларга нисбатан суд ҳукмлари эълон қилгани ҳолда жазо муқаррарлиги таъминланган бўлиб, 7 нафари раҳбар, 3 нафари хисобчи, 1 нафари ижрочи ходим ва 7 нафари бошқа шахслар ҳисобланади.

Коррупцияга қарши курашиш агентлиги

Матбуот хизмати