Шу кунларда Мисрда бўлиб ўтаётган БМТнинг Коррупцияга қарши курашиш конвенцияси иштирокчи-давлатлари 9-конференциясида Ўзбеситон Республикаси Коррупцияга қарши курашиш агентлиги директори Акмал Бурханов нутқ сўзлади.
 

Аввал хабар берганимиздек, тадбир БМТнинг Гиёҳванд моддалар ва жиноятчилик бўйича бошқармаси ҳамда Миср Араб Республикаси ҳукумати ҳамкорлигида ташкил этилган бўлиб, 170 дан ортиқ давлатларнинг коррупцияга қарши курашиш идоралари, соҳага оид нуфузли халқаро ташкилотлар ва етакчи экспертларни қамраб олди.

А.Бурханов ўз нутқида Ўзбекистонда давлат сиёсати даражасига кўтарилган коррупцияга қарши курашиш соҳасидаги тизимли асосда амалга оширилаётган ислоҳотлар, жумладан, хизматларни рақамлаштириш, давлат харидлари жараёнларига шаффоф механизмларни жорий этиш, давлат органлари ҳисобдорлиги ва очиқлигини таъминлаш, хабар берувчиларни ҳимоя қилишнинг ҳуқуқий асослари ва инструментларини такомиллаштириш, идораларда жорий этилаётган “комплаенс-назорат” тизими, давлат идоралари ҳузуридаги жамоатчилик кенгашлари, Коррупцияни қабул қилиш миллий индекси ҳамда Anti-Corruption Digest Uzbekistan онлайн журнали каби лойиҳалар юзасидан маълумот берди.

Ўзбекистоннинг коррупцияга қарши курашиш халқаро стандартларни миллий қонунчиликка имплементация қилиш юзасидан тегишли мандатга эга бўлган халқаро ташкилотлар билан ҳамкорлик қилишга тайёр эканлиги юқори минбардан туриб яна бир бор таъкидланди.

Шунингдек, Ўзбекистон томони БМТнинг “Коррупцияга қарши таълим ҳамда ёшлар ҳуқуқ ва имкониятларини кенгайтириш учун гдобал ресурс” (GRACE) ташаббусини қўллаб-қувватлаши маълум қилинди.

Шу билан бир қаторда, Конференция доирасида Ўзбекистон 14 ва 15 декабрь кунлари БМТ ТД ва БМТ ГЖБ билан биргаликда махсус сессияларни ташкил этиши режалаштирилган.