Мисрда давом этаётган БМТнинг Коррупцияга қарши конвенцияси иштирокчи- давлатларнинг 9-конференцияси доирасида “Ўзбекистонда коррупцияга қарши курашишда фуқаролик жамияти институтларининг иштирокини кучайтириш масалалари” мавзусидаги махсус сессиясида  Ўзбекистон Республикасида коррупцияга қарши курашиш соҳсидаги ислоҳотлар кўпчиликнинг қизиқишига сабаб бўлди.

Тадбирни кириш сўзи билан БМТ вакили Мирелла Думар Фраҳи хоним очар экан, Ўзбекистондаги фуқаролик жамиятининг коррупцияга қарши курашиш жараёнларидаги иштироки кеегайиб бораётгани ва бу борадаги бажарилган ишлар ва истиқболдаги режалар кўпчилик учун муҳим янгилик бўлгани туфайли ушбу глобал конференция доирасида Ўзбекистон учун алоҳида сессия ташкил этилганини таъкидлади. 

Ўз ўрнида Коррупцияга қарши курашиш агентлиги директори Акмал Бурханов бу борадаги ўзгаришлар мазмуни ва моҳияти тўғрисида, фуқаролик жамияти институтларини коррупцияга қарши курашиш жараёнларига жалб этиш агентликнинг асосий вазифаларидан бири этиб белгилангани, давлат органлари шаффофлигини таъминлаш, улар ҳузуридаги жамоатчилик кенгашлари фаолиятини такомиллаштиришга қаратилган ташкилий ва ҳуқуқий чоралар кўрилаётганини қайд этиб ўтди. 

Шундан сўнг Агентлик ҳузуридаги жамоатчилик кенгаши раиси Ахтам Турсунов ушбу кенгаш мисолида Ўзбекистондаги жамоатчилик кенгашлари фаолиятининг асосий жиҳатлари, ваколат ва вазифаларига тўхталиб ўтди. Маъруза давомида Кенгаш таркибини шакллантириш босқичлари, кенгаш фаолиятини такомиллаштиришда халқаро ташкилотлар, хусусан, БМТ экспертлари тавсиялари асосида тегишли ҳужжатлар ишлаб чиқилгани ва улар томонидан мунтазам равишда семинарлар ташкил этилиб, тавсиялар бериб борилаётгани қайд этди.  

Шунингдек, тадбир давомида Олий Мажлис Сенати қўмита раиси Н.Умаров томонидан фуқаролик жамияти институтлари фаолиятининг ҳуқуқий асослари хусусида тўхталиб ўтган бўлса, Олий Мажлис Қонунчилик палатаси ҳузуридаги Ёшлар парламенти раиси Шаҳноза Жолдасова коррупцияга қарши курашиш жараёнларига ёшларни жалб этиш ва улар томонидан амалга оширилаётган ишлар тўғрисида маълумот берди.  

Тадбирнинг якунида халқаро экспертлар ва хорижий давлатлар вакиллари Ўзбекистон аҳолисининг коррупцияга нисбатан муносабати, давлат хизматига  кириш жараёнларидаги коррупция омилларини бартараф этиш учун кўрилаётган чоралар, оммавий ахборот воситаларининг коррупцияга қарши курашишдаги ўрни ва иштироки каби масалаларда ўзларини қизиқтирган саволларга жавоб олишди.