Қарор лойиҳаси Коррупцияга қарши курашиш агентлиги томонидан Ўзбекистон Республикаси Президентининг 2021 йил 16 июндаги “Давлат органлари ва ташкилотларининг фаолияти очиқлигини таъминлаш, шунингдек, жамоатчилик назоратини самарали амалга оширишга доир қўшимча чора-тадбирлар тўғрисида”ги ПФ-6247-сон Фармонига мувофиқ ишлаб чиқилди.

Ҳужжат лойиҳаси билан Давлат органлари ва ташкилотлари фаолиятининг очиқлиги концепцияси ҳамда Давлат органлари ва ташкилотлари фаолияти очиқлигини мониторинг қилиш ва баҳолаш бўйича методикаси тасдиқланмоқда.

 Унда давлат органлари ва ташкилотлари очиқлик ва шаффофликни таъминлаш борасида ўз фаолиятида жорий этишлари лозим бўлган принциплар, шунингдек, ҳар йил якунлари бўйича аниқланадиган Давлат органлари ва ташкилотларининг очиқлик индексининг аниқлаш тартиблари белгиланмоқда.

Хусусан, Коррупцияга қарши курашиш агентлиги ҳузурида давлат органлари ва ташкилотларини очиқлик ҳамда шаффофлик борасида амалга оширган ишларининг мониторинг ва баҳолаш натижаларини кўриб чиқиш ва якуний рейтингни шакллантириш учун баҳолаш комиссиясини тузиш белгиланмоқда.

Комиссия Коррупцияга қарши курашиш агентлиги, Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлиги, Ўзбекистон Республикаси Ахборот технологиялари ва коммуникацияларини ривожлантириш вазирлиги, Ўзбекистон Республикаси Молия вазирлиги ва Ўзбекистон Республикаси Давлат Статистика қўмитаси масъул ходимлари ҳамда нодавлат нотижорат ташкилотлари вакилларидан иборат таркибда тузиш таклиф этилмоқда.

Давлат органлари ва ташкилотлари умумий 42 та мезонни ўз ичига олган 7 та индикатор асосида баҳолаб борилади.

1. Ахборот хизмати раҳбарининг фаолияти самарадорлигини баҳолаш мезонлари асосида давлат органлари ва ташкилотлари фаолияти очиқлигини таъминлашга масъул бўлган субъектлар фаолияти;
2. Расмий веб-сайт ва бошқа ахборот ресурсларида маълумотларни жойлаштириб бориш мажбуриятларига риоя қилиниши;
3. Очиқ маълумотлар порталидаги иштирок;
4. Ахборот тарқатиш электрон усулларининг самарадорлиги;
5. Жамоат коммуникация технологияларини жорий қилиш;
6. Коррупция ҳолатларини барвақт аниқлаш ва олдини олиш соҳасида амалга оширилган ишлар самарадорлиги;
7. Жамоатчилик кенгаши фаолияти самарадорлиги.

Лойиҳа давлат ҳокимияти ва бошқаруви органлари фаолияти очиқлиги, шаффофлиги ва ҳисобдорлигини таъминлаш, жамоатчилик назоратини кучайтириш, оммавий ахборот воситалари самарали фаолият юритишлари учун шарт-шароит яратиш, бюрократик тўсиқларни янада қисқартириш ва коррупция иллатларига барҳам беришга қаратилган.

Жамоатчилик муҳокамаси 2022 йил 11 январга қадар давом этади.