Ўзбекистон Республикаси Президентининг “Коррупцияга қарши курашиш ишларининг самарадорлигини рейтинг баҳолаш тизимини жорий этиш чора-тадбирлари тўғрисида”ги қарорига асосан, Коррупцияга қарши курашиш агентлиги томонидан  давлат органлари ва ташкилотларининг коррупцияга қарши курашишдаги самарадорлиги махсус электрон платформа “E-anticor.uz” орқали таҳлил қилинмоқда.

Хусусан, ўтган давр мобайнида давлат органлари ва ташкилотларига мазкур электрон платформадан фойдаланиш тартиби бўйича бир қатор семинарлар ўтказилди.
Ушбу платформага давлат органлари ва ташкилотлари томонидан 2022 йилда коррупцияга қарши курашиш бўйича амалга оширилган ишлари ҳақида маълумотлар киритилди.

Рейтинг баҳолаш натижалари холислигини таъминлаш мақсадида давлат органлари ва ташкилотлари томонидан электрон платформага киритилган мазкур маълумотлар мустақил экспертлар гуруҳи томонидан ҳам кўриб чиқилади.

Айни пайтда экспертлар гуруҳи таркиби шакллантирилиб, “E-anticor.uz” платформасига киритилган маълумотларни таҳлил қилиш ва баҳолаш ишлари амалга оширилмоқда.
Бугун Агентлик вакиллари ҳамда экспертлар гуруҳи аъзоларининг учрашуви ташкил этилиб, мазкур жараён билан боғлиқ муҳим масалаларнинг дастлабки муҳокамаси бўлиб ўтди.
Баҳолаш босқичлари ва якуний натижалар Агентлик расмий веб-сайти ва ОАВда батафсил ёритиб борилади.

Коррупцияга қарши курашиш агентлиги

Ахборот хизмати