Коррупцияга қарши курашиш агентлиги томонидан Жиззах вилоятида ўтказилган ўрганишда оилавий тадбиркорлик дастурлари доирасида 2022 йилда ажратилган имтиёзли кредит маблағлари ҳисобидан таъминотчиларга ўтказилган айрим ҳолатларда кредитлар мақсадсиз ишлатилганлиги аниқланган.

Ўрганиш натижаси бўйича тўпланган ҳужжатлар қонуний қарор қабул қилиш учун Агентлик томонидан Бош прокуратурага юборилиб, прокуратура органлари билан ҳамкорликда тегишли тадбирлар амалга оширилди.

Хусусан, Жиззах вилоят прокуратураси томонидан ўтказилган терговга қадар текширув натижаси бўйича “B” МЧЖ раҳбари Ж.Х. бир нечта фуқаролар билан шартнома тузиб, товарлар етказиб берилмаган бўлсада сохта электрон ҳисобварақ-фактуралар расмийлаштириб, фуқароларга ажратилган 163 млн.сўм миқдоридаги кредит маблағларини фирибгарлик йўли билан қўлга киритганлиги аниқланиб, “B” МЧЖ мансабдор шахслари ва бошқаларга нисбатан Ўзбекистон Республикаси Жиноят кодексининг 168-моддаси 3-қисми “а” банди (Фирибгарлик) ва 228-моддаси 2-қисми “б” банди (Ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилган. Ҳозирда тергов ҳаракатлари олиб борилмоқда.

Коррупцияга қарши курашиш агентлиги

Ахборот хизмати