Жорий йилнинг 15 февраль куни Коррупцияга қарши курашиш агентлигининг “Call-маркази”га шахсига оид маълумотларни сир сақлашни сўраган ҳолда фуқаро мурожаат қилиб, Қуйичирчиқ туманида жойлашган умумтаълим мактаби мансабдор шахслари томонидан содир этилаётган коррупциявий ҳолатлар ҳақида хабар берган.

Маълум бўлишича, мурожаатчи 2022 йилнинг декабрь ойига қадар Қуйичирчиқ туманида жойлашган умумтаълим мактабига инглиз тили фани ўқитувчиси сифатида ишга киришни сўраб директор ўринбосари “С.А.”га мурожаат қилганида ундан пора беришини талаб қилган.

Агентлик маълумоти асосида Иқтисодий жиноятларга қарши курашиш департаментининг Қуйичирчиқ туман бўлими томонидан ўтказилган тадбирда директор ўринбосари “С” фуқаронинг инглиз тили фани ўқитувчиси лавозимига қабул қилишга мактаб директори орқали ҳал қилиб бериш эвазига тамагирлик йўли билан пора олган вақтида ашёвий далиллар билан ушланган.

Мазкур ҳолат бўйича Жиноят кодексининг тегишли моддалари билан жиноят иши қўзғатилиб, ҳозирда тергов ҳаракатлари олиб борилмоқда.

Азиз юртдошлар, агар сиз фаолиятингиз давомида мансабдор шахларнинг коррупциявий хатти-ҳаракатларига дуч келсангиз, Агентликнинг “1253” рақамли “Call-маркази”га мурожаат қилишингиз мумкинлигини эслатиб ўтамиз.

Коррупцияга қарши курашиш агентлиги

Ахборот хизмати