Жорий йилнинг 5 апрель куни  Коррупцияга қарши курашиш агентлиги директори А.Бурханов TSUL TALKS (TED) лойиҳасининг меҳмони бўлди.

Маълумот учун: Мазкур лойиҳа 2018 йилдан буён Тошкент давлат юридик университети талабалари иштирокида суҳбат шаклида ўтказиб келинади. Лойиҳага ўз мутахассислиги бўйича катта мувафаққиятга эришиб келаётган жамиятнинг энг фаол ва илғор вакиллари таклиф этилади. Мақсад — спикер билан талабалар ўртасида ўзора фикр алмашиш, ўртоқлашиш орқали уларнинг дунёқарашини кенгайтириш, билим ва кўникмаларини оширишдан иборат.

Суҳбат аввалида А.Бурханов ўзининг касбий ва илмий фаолияти, эришган натижалари ҳақида талабаларга гапириб берди. Шунингдек, ўз ҳаётий тажриба ва хулосаларидан келиб чиққан ҳолда аниқ мақсадлар қўйиш ва уларга эришиш учун дадил интилиш, изланишда бўлиш бўйича тавсия ва маслаҳат бериб ўтди.

Талабалар Коррупцияга қарши курашиш агентлиги ва А.Бурхановнинг бугунги раҳбарлик фаолиятига алоҳида қизиқиш билдирди.

Савол-жавоблар мобайнида Агентлик томонидан амалга ошириб келинаётган ишлар ва уларнинг самараси хусусида ҳам батафсил маълумот берилди.

Коррупцияга қарши курашиш агентлиги

Ахборот хизмати