“Toshkent xalqa avtomobil yo‘llaridan foydalanish uchastka boshqarmasi” унитар корхонаси буюртмачилигида 2023 йил 31 март куни 2 та лот бўйича ўтказилган 3 млрд 220 млн сўмлик давлат харидида Ўзбекистон Республикаси “Давлат харидлари тўғрисида”ги Қонуннинг 10-моддаси (рақобат ва холислик принципи), 14-моддаси (манфаатлар тўқнашуви), 46-моддаси (давлат харидлари жараёнидаги чекловлар) талаблари бузилганлиги ва бошқа қонунбузилиш ҳолатларига йўл қўйилганлиги аниқланди.

Хусусан, 2 та лот бўйича харидда иштирок этган 2 нафардан тадбиркорларнинг ҳужжатлари харид комиссиясининг котиби фойдаланган компьютернинг IP-манзили орқали электрон платформага юкланган.

Шунингдек, ўтказилган ушбу давлат харидида харид комиссия раиси ва аъзоларининг иштирокисиз, бошқа шахс томонидан уларнинг электрон рақамли имзолари орқали харид натижалари баҳоланганлиги ва имзоланганлиги маълум бўлди.

Мазкур ҳолатлар бўйича 2023 йил 3 апрель куни харид комиссиясининг баённомасини бекор қилиш тўғрисида буюртмачига тақдимнома киритилди ва қонуний чора кўриш учун тўпланган ҳужжатлар Бош прокуратура ҳузуридаги Иқтисодий жиноятларга қарши курашиш департаментига юборилди ҳамда ҳолат бўйича хизмат текшируви ўтказиш учун Автомобиль йўллари қўмитасига сўровнома киритилди.

Агентликнинг тақдимномасига биноан “Toshkent xalqa avtomobil yo‘llaridan foydalanish uchastka boshqarmasi” унитар корхонаси томонидан 4 апрель куни харид комиссиясининг баённомаси бекор қилинди.

Коррупцияга қарши курашиш агентлиги

Ахборот хизмати