Коррупцияга қарши курашиш агентлиги томонидан давлат буюртмачиларининг махсус ахборот порталлари орқали амалга ошираётган давлат харидлари мунтазам ўрганилиб, йўл қўйилаётган қонунбузилиши ҳолатлари юзасидан тегишли чоралар кўрилмоқда.

Жумладан, ўрганиш жараёнида Шофиркон туман санитария-эпидемиологик осойишталик ва жамоат саломатлиги бўлими буюртмачилигида 2023 йил 17 май куни ўтказилган 591,0 млн.сўмлик давлат харидида соҳага оид қонунчилик талабларига амал қилинмаганлиги аниқланди.

Аниқроқ айтганда, мазкур давлат харидини амалга оширишда Ўзбекистон Республикаси “Давлат харидлари тўғрисида”ги қонуннинг 10-моддаси (рақобат ва холислик принципи), 14-моддаси (манфаатлар тўқнашуви), 46-моддаси (давлат харидлари жараёнидаги чекловлар) талаблари бузилган ва бошқа қонунбузилиши ҳолатларига ҳам йўл қўйилган.

Хусусан, ушбу харидда иштирок этган 2 нафар тадбиркорнинг ҳужжатлари харид комиссиясининг котиби фойдаланган компьютернинг IP-манзили орқали электрон платформага юкланган.

Мазкур ҳолатлар бўйича 2023 йил 18 май куни харид комиссиясининг баённомасини бекор қилиш тўғрисида буюртмачига тақдимнома киритилди ҳамда ҳолат бўйича хизмат текшируви ўтказиш учун Ўзбекистон Республикаси Санитария-эпидемиологик осойишталик ва жамоат саломатлиги хизматига сўровнома киритилди.

Агентликнинг тақдимномасига биноан Шофиркон туман санитария-эпидемиологик осойишталик ва жамоат саломатлиги бўлими томонидан 23 май куни харид комиссиясининг баённомаси бекор қилинди.

Коррупцияга қарши курашиш агентлиги

Ахборот хизмати