Тошкент вилояти ихтисослаштирилган соматика шифохонаси буюртмачилигида 2023 йил 23 май куни ўтказилган 500,0 млн сўмлик давлат харидида талабгор ва ғолиб деб топилган ““A.a.E. С.” МЧЖ раҳбари (E.B.O.)нинг отаси (U.O.E.) ушбу шифохонада хўжалик мудири ва харид комиссиясининг аъзоси бўлган.

Аммо мазкур ҳолат харид комиссияси томонидан эътиборга олинмай, ноҳалол рақобат келиб чиққанлиги ўрганилмаган ҳамда ҳолат бўйича танловни ўтказишни вақтинчалик бекор қилиш чоралари кўрилмаган.

Натижада Ўзбекистон Республикаси “Давлат харидлари тўғрисида”ги Қонуннинг:

10-моддаси (рақобат ва холислик принципи);

14-моддаси (манфаатлар тўқнашуви);

19-моддаси (давлат буюртмачилари);

42-моддаси (иштирокчини харид қилиш тартиб-таомилларида иштирок этишдан четлатиш шартлари) ҳамда “Рақобат тўғрисида”ги Қонуннинг талаблари бузилишига ва бошқа қонунбузилиши ҳолатларига йўл қўйилган.

Бундай ҳолатда, ўз навбатида, танлов жараёнларидан кейин ҳам манфаатлар тўқнашуви юзага келиш хавф-хатари мавжуд.

Бундан ташқари, “Давлат харидлари тўғрисида”ги Қонуннинг 46-моддасига зид равишда харидда иштирок этган 2 нафар тадбиркорнинг ҳужжатлари ушбу шифохона ходими томонидан буюртмачининг харид комиссия раиси, котиби, аъзолари иштирок этган ва фойдаланган компьютер IP-манзили орқали электрон платформага юкланганлиги маълум бўлди.

Мазкур ҳолатлар бўйича Коррупцияга қарши курашиш агентлиги томонидан 2023 йил 25 май куни харид комиссиясининг баённомасини бекор қилиш тўғрисида буюртмачига тақдимнома киритилди.

Шунингдек, қонуний чора кўриш учун тўпланган ҳужжатлар Бош прокуратура ҳузуридаги Иқтисодий жиноятларга қарши курашиш департаментига юборилди ҳамда ҳолат бўйича хизмат текшируви ўтказиш учун Соғлиқни сақлаш вазирлигига сўровнома киритилди.

Коррупцияга қарши курашиш агентлиги

Ахборот хизмати