Жорий йилнинг 7 июнь куни Коррупцияга қарши курашиш агентлиги томонидан Қорақалпоғистон Республикаси, вилоятлар ва Тошкент шаҳар ҳудудий кенгашлари иштирокида семинар машғулотлари бўлиб ўтди.

Семинарда Ҳуқуқни муҳофаза қилиш академияси бўлим бошлиғи Х.Турсунбеков “Ўзбекистон Республикаси қонунчилигида коррупция учун жавобгарлик” масалалари бўйича тақдимот қилди.

Тадбир давомида коррупцияга оид ҳуқуқбузарлик учун жавобгарликнинг ҳуқуқий асослари, турлари, жазони таъминлаш жараёнидаги бир қатор муаммолар ҳақида сўз борди.

Хусусан, коррупцияга қарши курашиш соҳасида ваколатли органлар ва уларнинг коррупцияга оид ҳуқуқбузарликни содир этган шахсни жазолашга доир ваколатлари бирма-бир ўрганилиб, таҳлил қилинди. Хусусан, Агентликнинг очиқлик таъминлаш, манфаатлар тўқнашуви каби йўналишларда янги ваколатлари ҳақида маълумот берилди.

Бундан ташқари, коррупциявий жиноят содир этган давлат фуқаролик хизматчисининг интизомий жавобгарлигига тўхталиб ўтилди.

Шунингдек, коррупцияга қарши курашишга оид маъмурий жавобгарликнинг 61-моддаси, 61-1-моддаси, 175-8-моддаси, 193-1-моддаси, 193-2-моддаси, қолаверса Жиноят кодексидаги коррупцияга оид бир қанча моддалар юзасидан тушунтиришлар берилди.

Семинарда халқаро тажриба ҳақида ҳам фикр юритилиб, БМТ конвенциясининг миллий қонунчилик ҳужжатлари билан хусусан, Маъмурий ва Жиноят кодекслари билан ўзаро боғлиқлиги ва фарқлари қиёсий таҳлил этилди.