Коррупцияга қарши курашиш агентлиги директори А.Бурхонов бошчилигидаги ишчи гуруҳ “Ҳудудгаз Андижон” газ таъминоти филиалида бўлиб, вилоятдаги автомобилларга газ тўлдириш компрессор шохобчаларига (АГТКШ) табиий газ етказиб бериш ҳолати билан танишди.

“Ҳудудгаз Андижон” газ таъминоти филиали масъуллари билан мулоқотда Ўзбекистон Республикаси Вазирлар Маҳкамаси томонидан 2023 йил 15 сентябрда қабул қилинган ва жорий йил 1 октябрдан кучга кирадиган “Ёқилғи-энергетика соҳасида бозор механизмларини жорий этишнинг қўшимча чора-тадбирлари тўғрисида”ги қарори бўйича амалга оширилиши лозим бўлган вазифалар кўриб чиқилди.

Ишчи гуруҳ улгуржи истеъмолчилар, жумладан, вилоятдаги мавжуд 113 та автомобилларга газ тўлдириш компрессор шохобчаларининг барчасида электрон газ ҳисоблаш ускуналари ўрнатилганлиги, мазкур ҳисоблагичлар табиий газ назорати ва ҳисобининг автоматлаштирилган тизимига тўлиқ уланганлигини ҳамда онлайн режимда маълумотлар узатилаётганлигини махсус дастур орқали кўздан кечирди.

Ишчи гуруҳ томонидан АГТКШлар томонидан табиий газ тармоқларига ноқонуний уланиш, ёқилғи-энергия ресурсларини талон-торож қилиш ва ноқонуний истеъмол қилишнинг бошқа ҳолатларини, шунингдек, уларни содир этишга имкон берувчи сабаб ва шарт-шароитларни аниқлаш, бартараф этиш ва олдини олиш бўйича назорат тадбирларини кучайтириш бўйича қатор тавсиялар берилди.

Коррупцияга қарши курашиш агентлиги

Ахборот хизмати