Коррупцяга қарши курашиш агентлиги Ишчи гуруҳи вакиллари Навоий вилоятидаги ўрганишлар мобайнида 27 сентябрь куни “Навоий кон-металлургия комбинати”нинг ишлаб чиқариш жараёнлари билан яқиндан танишиш мақсадида дунёдаги энг йирик олтин конлардан бири – «Мурунтов» кони ҳамда 2-гидрометаллургия заводида бўлди.

Вакилларимиз «Мурунтов» конида олтин таркибли маъдан қазиб олиш жараёни ҳамда 2-ГМЗда жойлашган Марказий кон бошқармасида ишлаб чиқаришнинг рақамлаштирилган ягона бошқарув маркази фаолияти билан танишди. 

Мазкур марказнинг асосий вазифаси геологик-қидирув ишлари, маъданни қазиб олиш, ташиш ва гидрометаллургия заводларида қайта ишлаш жараёнларини тўлиқ кузатиб бориш, таҳлил қилиш ва бошқаришдан иборатдир.

Ишчи гуруҳ вакиллари Навоий кон-металлургия комбинатидаги ишлаб чиқариш жараёнлари юқори даражада рақамлаштирилгани ва корхонада замонавий ахборот технологиялари кенг жорий этилганлигига гувоҳ бўлди.   

Вилоятда ўтказилган ўрганишлар мобайнида Навоий давлат педагогика институти фаолияти мисолида олий таълим соҳасида “Коррупциясиз соҳа” лойиҳасини амалга ошириш  ҳолати ҳам кўриб чиқилди. 

Институт раҳбарияти ва  масъул ходимлар билан мулоқотда  таъкидланишича, олий таълим муассасида  коррупциянинг олдини олишга қаратилган профилактик чоралар, жумладан, Институт ходимлари ва талаба-ёшларнинг ҳуқуқий маданиятини оширишга қаратилган тадбирлар мунтазам ташкил этиб келинмоқда. 

А.Бурханов коррупцияга нисбатан муросасизликни кучайтиришда тарғибот-ташвиқот тадбирлари сифатини ошириш ва изчил давом эттириш зарурати  юзасидан ўз фикр-мулоҳазаларини билдирди.

Коррупцияга қарши курашиш агентлиги

Ахборот хизмати