3 октябрь куни коррупцияга қарши ички назорат тузилмалари ходимлари учун “Коррупциянинг олдини олиш ва ҳалолликни тарғиб қилиш” мавзусида икки кунлик семинар-тренинг бошланди.

Семинар-тренинг Европа Иттифоқи ва Европа Кенгашининг “Марказий Осиё – ҳуқуқ устуворлиги: очиқлик ва иқтисодий жиноятларга қарши курашишда ҳамкорлик” (CА ТАEC) дастури билан ҳамкорликда ташкил этилди.

Маълумот ўрнида: Марказий Осиёда очиқликни таъминлаш ва иқтисодий жиноятларга қарши курашиш чора-тадбирлари дастури минтақада қонун устуворлигини таъминлашга муносиб ҳисса қўшиш мақсадида Европа Иттифоқи ва Европа Кенгаши томонидан биргаликда молиялаштирилган ва мазкур Кенгаш томонидан амалга оширилган қўшма ташаббусдир. У минтақавий ва миллий ўзига хосликларни ҳисобга олган ҳолда Марказий Осиёнинг беш давлатида (Қозоғистон, Қирғизистон, Тожикистон, Туркманистон ва Ўзбекистон) иқтисодий жиноятлар ва коррупцияга қарши кураш  ҳамда уларнинг олдини олиш салоҳиятини мустаҳкамлашга қаратилган.

Ушбу семинар-тренинг Коррупцияга қарши курашиш агентлиги томонидан комплаенс-назорат тузилмалари фаолиятига амалий кўмак кўрсатишни изчил давом эттириш, илғор хорижий амалиёт асосида тузилма ходимларининг билим ва кўникмаларини ошириш борасида ташкил этиб келинаётган ўқувларнинг навбатдагисидир.

Семинар-тренинг аввалида Ўзбекистонда коррупцияга қарши курашиш тизимининг ҳуқуқий ва институционал асослари,  соҳада  фуқаролик жамияти, оммавий ахборот воситалари билан ҳамкорлик, халқаро стандартлар ҳамда илғор тажрибаларга бағишланган тақдимотлар ўтказилди.

Европа кенгаши экспертлари томонидан коррупциянинг олдини олиш ва ички назорат тизимини жорий этишда илғор хорижий тажрибалар, коррупция хавф-хатарларини баҳолаш амалиёти, манфаатлар тўқнашувини аниқлаш ва бошқариш, давлат хизматида ҳалолликни таъминлаш, совға сиёсати, ва бу борада халқаро стандартлар ва энг яхши амалиётлар,  жумладан,  АҚШ, Буюк Британия, Латвия, Эстония, Малайзия давлатларининг тажрибалари бўйича батафсил маълумот берилди.

Қайд этилишича, Латвияда мансабдор шахсларнинг мол-мулклари ва даромадлари декларация қилинади. Давлат хизматчиларини ҳалоллик бўйича ўқитиш, коррупцияга нисбатан муросасиз муносабатни шакллантириш кенг йўлга қўйилган. Давлат харидларида потенциал коррупциявий хавф-хатарлар, ноқонуний орттирилган даромадлар мунтазам текшириб борилади. Бу жараёнда очиқ маълумотлар манбалари, шунингдек, банк ҳисобварақларидан фойдаланилади.

Буюк Британия эксперти Джон Бурбиджкингнинг таъкидлашича, Малайзия қонунчилигига кўра, хусусий секторга ISO 37001 халқаро стандарти талабларига жавоб бериши зарур бўлган Adequate procedure талаби қўйилган ва бу хусусий секторнинг давлат харидларида иштироки учун мажбурий шарт ҳисобланади. Бу билан Малайзия Аксилкоррупция комиссияси хусусий секторда корррупцияга қарши курашиш мехнизмларини жорий этишга эришди. Ушбу амалиёт, жумладан, Индонезия ва Франция давлатларида ҳам йўлга қўйилган. Эксперт фикрича, бундай ижобий тажрибани оммалаштириш мақсадга мувофиқ.  

Машғулотлар мобайнида эксперт Бурбиджкинг иштирокчиларга ISO 37001-2016 халқаро стандарти талабларидан келиб чиқиб, коррупциявий хавф-хатарларни аниқлаш ва баҳолаш жараёнларини турли ташкилотларнинг функциялари мисолида атрофлича тушунтириб берди.

Семинар-тренинг машғулотлари давом этмоқда.

Коррупцияга қарши курашиш агентлиги

 Ахборот хизмати