Маълумки, Коррупцияга қарши курашиш агентлиги томонидан ташкил этилаётган “9 декабрь — Халқаро коррупцияга қарши кураш” кунига бағишланган Антикоррупцион ҳафталик тадбирларига старт берилди.

2020 йил 24 ноябрь куни Тошкент шаҳридаги “Hyatt Regency” меҳмонхонасида Коррупцияга қарши курашиш агентлиги, Бирлашган Миллатлар Ташкилотининг Гиёҳванд моддалар ва жиноятчилик бўйича бошқармаси, Европа тикланиш ва тараққиёт банки ҳамкорлигида ташкил этилган “Бирлашган Миллатлар Ташкилотининг Коррупцияга қарши конвенцияси ва унинг бажарилиш механизмларини кўриб чиқиш” мавзусидаги семинарнинг биринчи куни бўлиб ўтди.

Семинарда халқаро ташкилотлар вакиллари, уларнинг мамлакатимиздаги ваколатхоналари раҳбарлари, Қозоғистон, Қирғизистон, Тожикистон, Туркманистон давлатларининг коррупцияга қарши курашиш соҳасидаги ваколатли органлар вакиллари, мамлакатимиздаги соҳага оид давлат ва нодавлат ташкилотлари вакиллари иштирок этмоқда.  

Семинар БМТнинг Коррупцияга қарши конвенцияси имплементацияси, мазкур жараёнларда давлатлар салоҳиятини кучайтириш, бу бўйича тегишли тавсиялар ишлаб чиқиш ҳамда давлат органлари ва фуқаролик жамияти институтлари ўртасидаги ўзаро ҳамкорлик учун платформа яратиш масалалари муҳокама этилмоқда.

Тадбир эртага ўз ишини давом эттиради.