Коррупцияга қарши курашиш агентлиги томонидан “Антикоррупция ҳафталиги” доирасида бир қатор вазирлик ва идораларда “Очиқ эшиклар кунлари” ўтказилмоқда.

Жорий йилнинг 3 декабрь куни Давлат божхона қўмитасида ҳам мазкур йўналишдаги тадбир ташкил этилди.

Тадбир доирасида фуқаролар, журналистлар, блогерлар, Агентлик ва Қўмита масъул ходимлари иштирок этишди.   

Идоралар ва давлат улушига эга тижорат банкларида яширин иқтисодиёт ва коррупцияга қарши мувофиқлик «комплаенс-назорат» тизимини жорий этиш ишларини мувофиқлаштириш вазифаси Агентлик зиммасига юклатилган.

Мазкур тизимни муваффақиятли жорий этилиши Ўзбекистоннинг халқаро рейтинг ва индекслардаги ўрнини яхшиланиши ва чет эл инвестицияси оқимининг ортишига сабаб бўлади.

Бу борада Давлат божхона қўмитаси тизимида коррупция ва бошқа салбий иллатларга қарши самарали курашишни ташкил этиш мақсадида, Божхона органлари ходимларининг одоб-аҳлоқ қоидалари, конунбузилишлар тўғрисидаги регламент ҳамда коррупция аломатларини фош этишда кўмаклашаётган шахсларни рағбатлантириш механизмлари ишлаб чиқилиб, амалиётга жорий этилётгани этироф этилди.

Тизимда коррупцияга қарши курашиш бўйича салмоқли ишлар амалга оширилиб келинаётганига қарамасдан, афсуски, Божхона идоралари мансабдор шахслари томонидан турли коррупцион жиноятлар ва таъмагирлик ҳолатлари, манфаатлар тўқнашуви ҳамда мансаб ваколатидан четга чиқиш каби ноқонуний ҳаракатлар содир этиб келинаётганлиги алоҳида қайд этилди.

Бу ҳолатлар тизимда коррупцияга қарши муросасиз кураш олиб боришни кучайтиришни тақозо этаётганлиги таъкидланди.
 

Шу боисдан йиғилишда Ўзбекистон Республикаси Коррупцияга қарши курашиш агентлиги ҳамда Давлат божхона қўмитаси ўртасида ўзаро ҳамкорлик тўғрисидаги Мeморандум имзоланди.

Меморандумда Давлат божхона қўмитасининг барча бўғинларида коррупцияга қарши мувофиқлик (“комплаенс-назорат”) тизимини босқичма- босқич жорий этиш, тизимда содир этиб келинаётган коррупцион ҳолатларнинг сабаб ва омилларини ўрганган ҳолда бартараф этиш каби аниқ чоралар белгиланди.

Ушбу ҳамкорлик мамлакатимизда коррупцияга қарши курашиш соҳасида ҳар икки ташкилот алоқаларини янада мустаҳкамлаб боришга асос бўлиб хизмат қилиши таъкидланди.