Коррупцияга қарши курашиш агентлиги томонидан малакали кадрларни ишга қабул қилиш бўйича эълон қилинган конкурснинг саралаш натижалари жорий йилнинг 17 август куни эълон қилинди. Унга кўра 146 нафар номзод тест синовлари босқичига ўтказилди.
Саралаш жараёнлари Ўзбекистон Республикаси Президентининг 2020 йил 29 июндаги «Ўзбекистон Республикасида коррупцияга қарши курашиш тизимини такомиллаштириш бўйича қўшимча чора-тадбирлар тўғрисида»ги ПФ-6013-сон Фармонида белгилаб ўтилган талабларга мувофиқ ўтказилди. Жумладан, номзодларни баҳолашда юриспруденция, иқтисодиёт, молия, солиқ, аудит, ахборот-коммуникация технологиялари каби соҳа мутахассисларига алоҳида эътибор қаратилди.
Шунингдек, номзодларнинг олий маълумотга эгалиги, коррупцияга қарши курашиш соҳасида етарли иш тажриба орттиргани, вилоят ва республика даражасидаги турли лавозимларда фаолият олиб боргани, қўшимча билим ва кўникмаларни тасдиқловчи ҳужжатларни тақдим этгани каби қатор омиллар ҳам инобатга олинди.
Шу ўринда айтиб ўтиш жоизки, Агентликка келиб тушган аризаларнинг асосий қисми (олий маълумотга эга бўлмаган номзодлар) ўрганиш жараёнида юқорида келтириб ўтилган талабларга мос келмаганлиги сабабли кейинги босқичга ўтказилмади.
Шу муносабат билан, конкурс комиссияси хулосасига кўра, 146 нафар номзодларнинг касбга оид билимларини ҳамда интеллектуал салоҳиятларини баҳолаш мақсадида жорий йилнинг 26 август куни соат 9:00 дан 16:00 га қадар Тошкент шаҳри ва ҳудудларда тест синовлари ўтказилади. Бунда хавфсизлик ва карантин талабларига тўлиқ риоя этилиши таъминланади.
Тест саволлари орқали номзодларнинг қонунчилик ва сиёсий юзасидан билимлари текширилади, шунингдек, уларнинг мантиқий ва таҳлилий фикрлаш қобилиятлари баҳоланади.
Тест босқичи Ўзбекистон Республикаси Бош прокуратураси Академияси билан ҳамкорликда ташкил этилмоқда. Жараёнларни нодавлат нотижорат ташкилотлари ва ОАВ вакиллари бевосита кузатиб боришади.