Коррупцияга қарши курашиш агентлиги Адлия вазирлигининг “Коррупцияга қарши кураш менежменти”ни тасдиқловчи халқаро ISO 37001:2016(E) стандарт сертификатига эга бўлгани билан табриклайди!

Ушбу ютуқ адлия тизимида олиб борилган самарали меҳнат натижаси ва эътирофидир. Бундай масъулиятни ўз зиммасига олишга барча идоралар ҳам жазм қила олмаслиги мумкин. Чунки ушбу стандартни жорий этиш учун қатор жиддий талабларни бажариш талаб этилади. 

Бугунги кунда Коррупцияга қарши курашиш агентлиги тегишли идоралар билан биргаликда давлатимиз раҳбари томонидан белгилаб берилган давлат ва хўжалик бошқаруви органлари, давлат корхоналари ва устав капиталида давлат улуши бўлган корхоналарда коррупцияга қарши ички назорат тизими («комплаенс-назорат»)ни жорий этиш ишларини амалга оширмоқда.

Хусусан, 26 та вазирлик, идоралар ва давлат улушига эга тижорат банкларида “коррупцияга қарши мувофиқлик тизими”ни жорий этишни назарда тутувчи “йўл хариталари” ишлаб чиқилди. Ушбу “йўл хариталари”да халқаро ISO 37001:2016(E) стандарт сертификатини қўлга киритиш вазифаси белгилаб қўйилган.

Адлия вазирлиги томонидан халқаро ISO 37001:2016(E) стандарт сертификатининг қўлга киритилиши юртимизда ушбу йўналишда амалга оширилаётган ишларнинг дастлабки ютуғи, десак, муболаға бўлмайди.

Ўз навбатида, Коррупцияга қарши курашиш агентлиги барча вазирлик ва идораларга ушбу муҳим вазифани амалга оширишда ҳар қандай кўмакка тайёрлигини билдиради ҳамда бу масаланинг якунига етказилишини қаттиқ назоратга олади.