Korrupsiyaga qarshi kurashish agentligi Adliya vazirligining “Korrupsiyaga qarshi kurash menejmenti”ni tasdiqlovchi xalqaro ISO 37001:2016(E) standart sertifikatiga ega bo‘lgani bilan tabriklaydi!

Ushbu yutuq adliya tizimida olib borilgan samarali mehnat natijasi va e'tirofidir. Bunday mas'uliyatni o‘z zimmasiga olishga barcha idoralar ham jazm qila olmasligi mumkin. Chunki ushbu standartni joriy etish uchun qator jiddiy talablarni bajarish talab etiladi. 

Bugungi kunda Korrupsiyaga qarshi kurashish agentligi tegishli idoralar bilan birgalikda davlatimiz rahbari tomonidan belgilab berilgan davlat va xo‘jalik boshqaruvi organlari, davlat korxonalari va ustav kapitalida davlat ulushi bo‘lgan korxonalarda korrupsiyaga qarshi ichki nazorat tizimi («komplaens-nazorat»)ni joriy etish ishlarini amalga oshirmoqda.

Xususan, 26 ta vazirlik, idoralar va davlat ulushiga ega tijorat banklarida “korrupsiyaga qarshi muvofiqlik tizimi”ni joriy etishni nazarda tutuvchi “yo‘l xaritalari” ishlab chiqildi. Ushbu “yo‘l xaritalari”da xalqaro ISO 37001:2016(E) standart sertifikatini qo‘lga kiritish vazifasi belgilab qo‘yilgan.

Adliya vazirligi tomonidan xalqaro ISO 37001:2016(E) standart sertifikatining qo‘lga kiritilishi yurtimizda ushbu yo‘nalishda amalga oshirilayotgan ishlarning dastlabki yutug‘i, desak, mubolag‘a bo‘lmaydi.

O‘z navbatida, Korrupsiyaga qarshi kurashish agentligi barcha vazirlik va idoralarga ushbu muhim vazifani amalga oshirishda har qanday ko‘makka tayyorligini bildiradi hamda bu masalaning yakuniga yetkazilishini qattiq nazoratga oladi.