Ўзбекистон Республикаси Коррупцияга қарши курашиш агентлиги директори Акмал Бурханов ва Америка Қўшма Штатларининг Ўзбекистондаги Фавқулодда ва муҳтор элчиси Дэниел Розенблюм ўртасида онлайн-конференция тарзидаги учрашув бўлиб ўтди. Учрашувда, шунингдек, АҚШ Давлат департаментининг наркотиклар ва ҳуқуқни қўллаш устидан назорат қилиш Бюроси (INL) бўлинмаси бошлиғи Рассел Сингер ҳам иштирок этди.

Мулоқот аввалида Агентлик директори Президент Шавкат Мирзиёев раҳбарлигида Ўзбекистонда коррупцияга қарши курашиш соҳасида олиб борилаётган ислоҳотлар, бугунги кунда юртимизда коррупцияга қарши курашиш масаласи давлат сиёсати даражасига кўтарилгани, бунинг натижасида амалга оширилган қатор чора-тадбирлар ҳақида маълумот берди.

Таъкидланганидек, Давлат раҳбари ташаббуси билан Ўзбекистонда янги тузилма — Коррупцияга қарши курашиш агентлиги ташкил этилди. Агентлик фаолиятини йўлга қўйишда илғор хорижий тажрибалар ўрганилгани, хусусан, Иқтисодий ҳамкорлик ва тараққиёт ташкилотининг тавсия ва таклифлари инобатга олингани билдирилди.

Шунингдек, учрашувда бугунги кунда Агентлик олдида турган долзарб вазифалар ҳамда амалга оширилаётган лойиҳалар ҳақида сўз борди. Хусусан, 20дан зиёд давлат идораларида коррупцияга қарши курашиш (“комплаенс-назорат”) тизимини жорий этиш ишлари бошлангани, тегишли вазирлик ва идоралар, шу жумладан халқаро ташкилотлар билан ҳамкорликда «Ўзбекистон Республикаси коррупцияга қарши курашиш агентлиги тўғрисида»ги қонун лойиҳаси ишлаб чиқилгани ва айни кунларда жамоатчилик муҳокамасига тақдим этилгани маълум қилинди.

Ўз ўрнида, элчи Д.Розенблюм давлат ва унинг иқтисодиёти ривожида коррупциянинг олдини олиниши ва унга қарши курашиш муҳимлиги, бу борада АҚШ барча йўналишларда ҳамкорлик ва кўмак кўрсатишга тайёр эканлигини билдирди. Шу билан бир қаторда, АҚШ элчиси Агентлик ва ҳуқуқни муҳофаза қилувчи органлар ходимларини коррупцияга қарши курашиш соҳасида АҚШ ва бошқа давлатларнинг илғор тажрибаларини ўрганиш мақсадида 2021 йилда АҚШга хизмат сафарларини ташкиллаштириш, Тошкентда турли ўқув семинарлари ва бошқа тадбирларни ўтказишга тайёрлигини билдирди.

Учрашув якунида икки томон ўртасида муҳокама қилинган йўналишлар бўйича ҳамкорликни йўлга қўйиш бўйича дастлабки келишувга эришилди.