Жорий йилнинг 11 февраль куни Коррупцияга қарши курашиш агентлиги раҳбарияти ҳамда Буюк Британия ва Шимолий Ирландия бирлашган қироллигининг Фавқулодда ва мухтор элчиси Тим Торлот билан онлайн мулоқот бўлиб ўтди.

Учрашувда коррупцияга қарши курашишда икки томонлама ҳамкорликни янада ривожлантириш, Буюк Британия ва Ўзбекистон ваколатли органлари ўртасида ўзаро тажриба алмашиш, экспертлик кўмагини ташкил этиш каби масалалар муҳокама қилинди.

Мулоқотда Агентлик директори Акмал Бурханов мамлакатда коррупцияга қарши курашиш йўналишида амалга оширилаётган ислоҳотлар, миллий қонунчиликни такомиллаштириш ҳамда бунда Агентликнинг иштироки тўғрисида маълумот берди.

Ўз навбатида, Буюк Британиянинг фавқулодда ва мухтор элчиси Тим Торлот мазкур соҳада Ўзбекистондаги ишларни эътироф этган ҳолда, Буюк Британиянинг тажрибаси ва тегишли идоралари фаолияти юзасидан маълумот берди. Шу билан бирга Элчи жаноблари коррупцияга қарши курашишда жамоатчилик ва оммавий ахборот воситаларининг ўрни юқори эканлигини таъкидлаб, Агентлик қошида ташкил этилган Жамоатчилик кенгаши ва Журналист ва блогерлар клуби фаолиятига хайрихоҳлигини билдирди. Коррупцияга қарши курашишда фуқаролик жамияти институтлари фаоллигини ошириш, журналистлар учун тажриба алмашиш бўйича семинарлар ташкил этишга тайёр эканлигини билдирди.
 

Шунингдек, Агентлик вакиллари асосий фаолият йўналишлари қаторида давлат хизматчиларининг ҳалоллик стандартига амал қилишини таъминлаш масаласи ҳам мавжуд эканлигини таъкидлашди. Бу борада Тим Тарлот Ҳукуматлараро ҳамкорлик ташкилоти (UK Government Partnership International) кўп йиллик тажрибага эга эканлигини қайд этиб ўтди. Ушбу ташкилот Буюк Британия ва хорижий мамлакатларда давлат хизмати фаолиятини самарали ташкил этишга ихтисослашганини эътиборга олган ҳолда давлат хизмати ходимларига ҳалоллик стандартларини сингдириш бўйича семинар ўтказиш ташаббуси билан чиқди.  

Бундан ташқари учрашувда Агентликнинг давлат бошқарув органлари, ижро ҳокимияти тузилмалардаги иштироки билан бир вақтда бизнес тузилмаларидаги коррупцияга қарши курашиш бўйича фаолияти бўйича ҳам ўзаро фикр алмашилди. Бу борада “Коррупцияга қарши курашиш халқаро стандартларини Ўзбекистон Республикаси қонунчилигига имплементация қилишни давом эттириш бўйича йўл харитаси”дан “Коррупцияга қарши махсус тадбирларни хусусий секторга жорий этишга фаол кўмаклашиш мақсадида Ўзбекистон бизнесининг Коррупцияга қарши курашиш хартиясини ишлаб чиқиш ва унинг мониторингини юритиш” вазифаси ўрин олгани таъкидланди. 

Учрашув якуни бўйича томонлар ўртасида бир неча йўналиш ва соҳаларда ҳамкорликни йўлга қўйиш, Буюк Британиянинг коррупцияга қарши курашиш бўйича қонун ҳужжатлари билан бўлишиш ҳамда тегишли идоралар тажрибасини ўрганиш бўйича келишувга эришдилар.
 

Маълумот учун: Буюк Британия Transparency International халқаро ташкилотининг коррупцияни қабул қилиш индекси бўйича 180 мамлакат орасида 11-ўринда туради.

Буюк Британияда коррупцияга қарши курашувчи қуйидаги тузилмалар мавжуд.

1.Ўта оғир фирибгарликларга қарши курашиш бўлими (Serious Fraud Agency -SFO) – бу ўта оғир фирибгарлик, порахўрлик ва коррупция каби энг юқори даражадаги жиноятлар билан шуғулланадиган ихтисослаштирилган прокуратура органи.

2. Жиноятчиликка қарши курашиш миллий агентлиги (National Crime Agency-NCA) – бу давлат идораларидаги коррупциянинг олдини олиш ва тергов қилиш билан шуғулланади. Жиддий қонунбузарликлар ва юқори лавозимли мансабдор шахсларга қаратилган жиноятлар асосий фаолият йўналиши ҳисобланади.

3. Иқтисодий жиноятчиликка қарши курашиш миллий маркази (National Center on Economic Crime) – ушбу марказ Буюк Британиянинг иқтисодий жиноятчиликка қарши курашиш органи ҳисобланади.