Ўзбекистон Республикаси Жиноят кодексининг янги таҳрирдаги лойиҳаси ишлаб чиқилиб, жамоатчилик муҳокамасига қўйилди.

Кодекс лойиҳасида коррупция билан боғлиқ жиноятларга оид бир қатор муҳим ўзгаришлар киритилмоқда.

Хусусан,

• Давлат хизматчисининг ноқонуний бойлик орттирганлиги учун жавобгарлик белгиланмоқда;
• пора предмети сифатида моддий ёки мулкий манфаатдорлик билан бир қаторда номоддий ёки номулкий манфаатдорлик бўлишга оид қоидалар белгиланмокда;
• пора берганлик учун жавобгарлик кучайтирилмоқда;
• чет эл фуқаролари, шунингдек Ўзбекистон ҳудудида доимий яшамайдиган фуқаролиги бўлмаган шахслар Ўзбекистон Республикаси жисмоний шахслари иштирокидаги коррупциявий жиноятлар содир қилганда (Ўзбекистон ҳудудидан ташқарида содир этган жиноятлари учун ўша давлат судининг ҳукми билан жазоланган бўлмасалар) ушбу Кодекс бўйича жавобгарликка тортилиши белгиланмоқда;
• Жавобгарликка тортиш муддатининг ўтиб кетганлиги муносабати билан жиноят учун жавобгарликдан озод қилиш муддатлари коррупциявий жиноятларга нисбатан бир ярим баравар кўпайиши назарда тутилмоқда;
• коррупциявий қилмишларга қайси турдаги жиноятлар кириши алоҳида белгилаб қўйилмоқда. Жумладан:

Тижоратда пора эвазига оғдириб олиш;

Нодавлат тижорат ташкилотининг ёки бошқа нодавлат ташкилотининг хизматчисини пора эвазига оғдириб олиш;

Пора олиш;

Пора бериш;

Пора олиш-беришда воситачилик қилиш;

Давлат органининг, давлат иштирокидаги ташкилотнинг ёки фуқаролар ўзини ўзи бошқариш органининг хизматчисини пора эвазига оғдириб олиш;

Давлат органи, давлат иштирокидаги ташкилот ёки фуқароларнинг ўзини ўзи бошқариш органи хизматчисининг қонунга хилоф равишда моддий қимматликлар олиши ёки мулкий манфаатдор бўлиши;

Ҳарбий мансабдорлик жиноятлари таснифига кирувчи ҳокимиятни суиистеъмол қилиш, ҳокимият ваколатидан ташқарига чиқиш ёки ҳокимият ҳаракатсизлиги жинояти;

Шахсий манфаатларини ёки бошқа шахсларнинг манфаатларини кўзлаб таъмагирлик ниятида:

нодавлат тижорат ташкилотида ёки бошқа нодавлат ташкилотида мансабдор шахслар томонидан ўз ваколатларини суиистеъмол қилиш;

ҳокимият ёки мансаб ваколатини суиистеъмол қилиш;

ноқонуний бойиш;

ҳокимият ёки мансаб ваколати доирасидан четга чиқиш;

Мансаб мавқеини суиистеъмол қилиш йўли билан ўзлаштириш ёки растрата йўли билан талон-торож қилиш;

Хизмат мавқеидан фойдаланиб Фирибгарлик қилиш;

Хизмат лавозимидан фойдаланган ҳолда Божхона тўғрисидаги қонун ҳужжатларини бузиш;

Жиноий фаолиятдан олинган пул маблағлари ёки бошқа мол-мулкка қонуний тус бериш (агар мазкур жиноят коррупциявий жиноятларни содир этиш натижасида олинган даромадларга нисбатан содир этилган бўлса).

Эслатиб ўтамиз, Ўзбекистон Республикаси Жиноят кодексининг янги таҳрирдаги лойиҳасига 9 мартга қадар ўз таклифларингизни билдиришингиз мумкин.