Коррупцияга қарши курашиш агентлиги томонидан ички ишлар органларининг ҳудудлардаги фаолияти бўйича ўрганишлар давом этмоқда.

Навбатдаги ўрганишлар Самарқанд вилоятида бўлиб ўтмоқда. Жумладан, жорий йилнинг 2 март куни Агентлик ва Ички ишлар вазирлиги Ўз хавфсизлиги хизмати масъул ходимлари томонидан Самарқанд шаҳри, Ургут ва Пастдарғом туманларида ички ишлар органларининг иш фаолияти ўрганилди.

Бунда аҳоли ва жамоатчилик вакилларининг фикр-мулоҳазаларига алоҳида эътибор қаратилмоқда. Хусусан, Адвокатлар палатаси, Савдо-саноат палатасининг ҳудудий бўлинмалари, Самарқанд давлат университети, таълим ва соғлиқни сақлаш муассасалари, маҳаллаларда фуқаролар билан бевосита мулоқот ташкил қилинди. Унда ҳуқуқ-тартибот органлари билан муносабатларда келиб чиқаётган муаммолар ва камчиликлар ўрганилди ҳамда аноним сўровлар ўтказилди.

Шунингдек, айни шу куни вилоят суди, прокуратураси, адлия, ички ишлар ва бошқа ҳуқуқни муҳофаза қилиш органлари ҳамда жамоатчилик вакиллари иштирокида йиғилиш ташкил этилиб, унда вилоятда коррупцияга қарши курашиш борасида олиб борилаётган чоралар ва қилиниши лозим бўлган ишлар муҳокама қилинди.

Шунингдек, тадбирда Коррупцияга қарши курашиш агентлиги масъуллари томонидан коррупция хавфи юқори бўлган соҳалар баён қилиниб, коррупциянинг олдини олиш чора-тадбирлари, шунингдек кадрлар билан ишлаш, уларнинг билим ва малакасини ошириш, жамоаларда коррупцияга муросасиз руҳдаги маънавий-аҳлоқий муҳитни яратиш юзасидан таклиф ва тавсиялар берилди. 

Ўрганиш якунлари бўйича ҳуқуқ-тартибот органлари фаолиятидаги коррупцион омилларга барҳам бериш, фуқароларга кўрсатилаётган хизматлар сифатини яхшилаш, ортиқча бюрократик тўсиқларни бартараф қилишга қаратилган таклифлар ишлаб чиқиш кўзда тутилган.

Ўрганишлар давом этмоқда.