Коррупцияга қарши курашиш агентлиги ишчи гуруҳи Қорақалпоғистон Республикасида ҳуқуқ тартибот органлари фаолиятини ўрганмоқда.

Ушбу ўрганишлар давомида бир қатор муассасалар ҳамда маҳаллаларда аҳоли билан мулоқотлар ташкил этилди.

Жумладан, Фавқулодда вазиятлар бошқармасининг ҳарбий хизматчилари билан "Коррупцияга қарши курашиш ва унинг салбий оқибатлари” мавзусида учрашув ўтказди. Учрашувда коррупциянинг оқибатлари, унга қарши кураш ва коррупцияга сабаб бўлаётган омилларнинг мониторинги ҳақида тушунтиришлар берилди.

Маълумки, ҳуқуқ тартибот органи ходимини тайёрлашда унга ҳалоллик вакцинасини сингдириш, коррупцияга қарши муросасиз кайфиятни шакллантириш муҳим аҳамият касб этади.

Шу боисдан, ишчи гуруҳ аъзоларининг навбатдаги манзили ИИВ Нукус “Темурбеклар мактаби” ҳарбий академик лицейи бўлди. Бу ерда ўқувчилар учун яратилган шароитлар, ўқув ва тарбиявий дастурларнинг мазмуни, уларда коррупцияга қарши муросасизлик кайфиятини шакллантириш бўйича кўрилаётган чоралар ўрганилди.

Ишчи гуруҳ аъзолари шунингдек, аҳоли ва ички ишлар органлари ходимлари ўртасида коррупция иллатини келтириб чиқарувчи сабаб ва омиллар тўғрисида сўровлар ҳам ўтказмоқда.