Korrupsiyaga qarshi kurashish agentligi ishchi guruhi Qoraqalpog‘iston Respublikasida huquq tartibot organlari faoliyatini o‘rganmoqda.

Ushbu o‘rganishlar davomida bir qator muassasalar hamda mahallalarda aholi bilan muloqotlar tashkil etildi.

Jumladan, Favqulodda vaziyatlar boshqarmasining harbiy xizmatchilari bilan "Korrupsiyaga qarshi kurashish va uning salbiy oqibatlari” mavzusida uchrashuv o‘tkazdi. Uchrashuvda korrupsiyaning oqibatlari, unga qarshi kurash va korrupsiyaga sabab bo‘layotgan omillarning monitoringi haqida tushuntirishlar berildi.

Ma’lumki, huquq tartibot organi xodimini tayyorlashda unga halollik vaksinasini singdirish, korrupsiyaga qarshi murosasiz kayfiyatni shakllantirish muhim ahamiyat kasb etadi.

Shu boisdan, ishchi guruh a’zolarining navbatdagi manzili IIV Nukus “Temurbeklar maktabi” harbiy akademik litseyi bo‘ldi. Bu yerda o‘quvchilar uchun yaratilgan sharoitlar, o‘quv va tarbiyaviy dasturlarning mazmuni, ularda korrupsiyaga qarshi murosasizlik kayfiyatini shakllantirish bo‘yicha ko‘rilayotgan choralar o‘rganildi.

Ishchi guruh a’zolari shuningdek, aholi va ichki ishlar organlari xodimlari o‘rtasida korrupsiya illatini keltirib chiqaruvchi sabab va omillar to‘g‘risida so‘rovlar ham o‘tkazmoqda.