Жорий йилнинг 18 март куни Коррупцияга қарши курашиш агентлиги ҳамда БМТ Тараққиёт Дастурининг Ўзбекистондаги ваколатхонаси томонидан Ўзбекистон Республикасининг Коррупцияга қарши курашиш бўйича 2021-2025 йилларга мўлжалланган Миллий стратегияси лойиҳаси муҳокамасига бағишланган Миллий маслаҳат йиғилиши ташкил этилди.

Мазкур тадбирда мамлакатимиздаги фуқаролик жамияти институти, хусусан, нодавлат нотижорат ташкилотлари, сиёсий партиялар, оммавий ахборот воситалари вакиллари ҳамда Агентлик ҳузуридаги жамоатчилик кенгаши аъзолари иштирок этишди.

Таъкидлаш жоизки, “2021-2025 йилларга мўлжалланган Ўзбекистон Республикасининг коррупцияга қарши курашиш миллий стратегияси” лойиҳаси Ўзбекистон Республикаси Президентининг 2021 йил 3 февралдаги Фармони билан тасдиқланган Давлат дастури ижроси доирасида ишлаб чиқилган бўлиб, уни маромига етказиш, ҳаётийлигини таъминлаш мақсадида давлат ташкилотлари, фуқаролик жамияти институтлари, академик доира вакиллари ҳамда халқаро экспертлар иштирокида Миллий ва халқаро маслаҳатлашувлар ташкил этиш режалаштирилган. 

Жорий йилнинг 28 январь куни мазкур Стратегиянинг дастлабки лойиҳаси Олий Мажлис палаталари, Судьялар олий кенгаши, Бош прокуратура, вазирлик ва бошқа давлат ташкилотлари вакиллари иштирокида муҳокамадан ўтказилган эди. Унда ҳар бир иштирокчи томонидан билдирилган таклифлар асосида стратегия лойиҳаси янада такомиллаштирилди.

Таъкидланганидек, миллий маслаҳатлашув йиғилишининг бу галгиси Стратегия лойиҳаси юзасидан фуқаролик жамияти институти вакилларининг фикрини олиш, ўзаро муҳокама қилиб олиш ва унга таклифлар олиш мақсадида ташкил этилди. Йиғилишда Стратегия лойиҳасининг турли доира вакиллари иштирокида муҳокама қилиш муҳимлиги, зеро коррупцияни бартараф этиш учун биргина давлат органларини сафарбар қилиш орқали натижага эришиб бўлмаслиги, коррупция иллатини йўқотиш учун ҳамма бирлашиб, мувофиқлашган ҳолда курашни ташкил этиш лозимлиги таъкидланди.

Йиғилишда қайд этилганидек, Миллий стратегия келгуси беш йилликдаги коррупциянинг олдини олиш ва унга қарши курашиш соҳасидаги асосий устувор вазифаларни белгилаб берувчи, бу борадаги ҳаракатларни бирлаштирувчи ва мувофиқлаштирувчи ҳужжат ҳисобланади.

Миллий стратегия лойиҳасини тайёрлашда Грузия, Эстония, Малайзия, Индонезия, Италия, Буюк Британия каби қатор хорижий давлатлар тажрибаси ўрганилди.

Мазкур давлатларда ушбу турдаги ҳужжатларнинг қабул қилиниши коррупциянинг олдини олиш ва унга қарши курашишда ижобий натижа берганлиги ҳамда мамлакатнинг янада ривожланишига хизмат қилган.

Миллий стратегия лойиҳасида Ўзбекистонда коррупцияга қарши курашиш соҳасидаги жорий ҳолат, камчиликлар, давлат сиёсатининг келгусидаги асосий йўналишларини акс эттириш кўзда тутилган. Шунингдек, ушбу вазифаларнинг бажарилишини мониторинг қилиш ва молиялаштириш механизмини белгилаш ҳамда амалга оширилган ишлардан кутилаётган натижалар ўрин олиши режалаштирилган.

Қизғин баҳс-мунозаралар ва таклифларга бой ўтган йиғилишда ҳар бир иштирокчи ўз йўналишидан келиб чиққан ҳолда мулоҳазаларини билдирди. Жумладан, коррупцияга қарши курашишда фуқаролик жамияти институтлари ҳамда оммавий ахборот воситалари вакилларининг ролини ошириш, жамоатчилик назоратини кучайтириш, аҳолининг ҳуқуқий саводхонлиги ҳамда коррупцияга қарши муросасиз кайфиятини шакллантиришда улар имкониятларидан янада кенгроқ фойдаланиш бўйича тегишли таклифлар илгари сурилди.

Йиғилиш якунида билдирилган таклифлар асосида Миллий стратегия лойиҳаси такомиллаштириладиган бўлди.