Жорий йилнинг 19 март куни Коррупцияга қарши курашиш агентлиги томонидан “Коррупцияга қарши комплаенс-назорат хизмати фаолиятини тубдан такомиллаштириш чора-тадбирлари тўғрисида”ги қарор лойиҳаси юзасидан дастлабки муҳокама тадбири ташкил этилди. Унда Бош прокуратура, Ҳисоб палатаси, Молия, Бандлик ва меҳнат муносабатлари вазирликлари, “Ўзстандарт” агентлиги, Давлат бошқаруви академияси ва Бош прокуратура академияси ҳамда бошқа манфаатдор ташкилотлар иштирок этишди.
 

Тадбирда таъкидланганидек, 2020-2021 йилларда барча давлат ва хўжалик бошқаруви органлари, давлат корхоналари ва устав капиталида давлат улуши бўлган корхоналар, шу жумладан банкларда коррупцияга қарши ички назорат тизими (“комплаенс-назорат”) босқичма-босқич жорий этиш Коррупцияга қарши курашиш агентлигининг асосий вазифларидан бири этиб белгиланган.

Бугунги кунда, 26 та вазирлик ва идораларда яширин иқтисодиёт улушини қисқартириш ва коррупцияга қарши ички назорат “комплаенс-назорат” тизимини жорий этиш ишлари йўлга қўйилди.

Бироқ вазирлик ва идораларда мазкур аксилкоррупциявий профилактик тизимни жорий этишга оид ҳуқуқий асосларнинг мавжуд эмаслиги турлича ёндашувларга олиб келмоқда ҳамда қатор муаммоларни келтириб чиқармоқда. Тузилма фаолиятини йўлга қўйиш, Комплаенс хизматининг мақоми, асосий фаолият йўналишлари, ҳуқуқ ва мажбуриятлари аниқ белгиланмаганлиги шулар жумласидандир.

Қайд этилганидек, “Ёшларни қўллаб-қувватлаш ва аҳоли саломатлигини мустаҳкамлаш йили”да амалга оширишга оид давлат дастурининг 34-банди ижросини таъминлаш мақсадида, Агентлик томонидан Ўзбекистон Республикаси Президентининг “Коррупцияга қарши комплаенс-назорат хизмати фаолиятини тубдан такомиллаштириш чора-тадбирлари тўғрисида”ги Қарор лойиҳаси ишлаб чиқилди.

Муҳокамалар давомида мазкур профилактик тизимнинг ҳар бир ташкилотда жорий этилишини инобатга олган ҳолда, коррупцияга қарши комплаенс-назорат хизмати фаолияти мустақиллигини таъминлаш, малакали мутахассисларни фақат танлов асосида ишга қабул қилиш, ушбу жараёнда психологик тест синовидан ўтказиш, иш фаолиятини натижадорлиги ва самарадорлигини баҳолаш мезонларини ишлаб чиқиш масалалари юзасидан фикр-мулоҳаза ҳамда таклифлар берилди.

Билдирилган таклифлар асосида қарор лойиҳаси янада такомиллаштирилади.