Кадастр агентлиги тизимида коррупцияга қарши курашишни янада кучайтириш мақсадида пора таклиф этган шахсларнинг фош этилишида ташаббус кўрсатган ходимни моддий рағбатлантириш тизими жорий этилган.

2021 йилнинг 17 февраль куни Кадастр агентлиги Зангиота туман бўлими бошлиғи вазифасини бажарувчи Азамат Адиловга енгил типдаги иссиқхона ташкил этиш учун ажратилган ер майдонининг топографик съёмкасини тасдиқлаб бериш эвазига фуқаро томонидан 1000 АҚШ доллари миқдорида пора таклиф қилинган.

Бўлим бошлиғи пора таклиф қилаётган фуқаро тўғрисида Зангиота туман Иқтисодий жиноятларга қарши курашиш департаментига хабар берган ва фуқаронинг ноқонуний хатти-ҳаракатлари фош этилган.

Бугун юқоридаги ташаббускор ходим Кадастр агентлиги раҳбарияти, Коррупцияга қарши курашиш агентлиги вакиллари, Тошкент вилоятидаги кадастр тизимининг барча раҳбар ва ходимлари иштирокида 10 миллион сўм пул мукофоти ҳамда Хонобод сиҳатгоҳига 2 кишилик йўлланма билан рағбатлантирилди.

Тадбирда сўзга чиққан Коррупцияга қарши курашиш агентлиги масъул ходими бу каби ҳолатлар юртимизда коррупцияга қарши олиб борилаётган курашнинг кичик бир натижаси эканлиги, коррупциянинг ҳар қандай кўринишига нисбатан муросасизлик ҳар бир давлат хизматчисининг асосий шиорига айлансагина кўзланган натижаларга эришиш мумкинлигини таъкидлаб ўтди.

Эслатиб ўтамиз, 2020 йилда Коррупцияга қарши курашиш агентлиги ва Кадастр агентлиги ўртасида ҳамкорлик меморандуми имзоланганди. Унда кадастр тизими ходимларининг коррупцияга муросасизлик кайфиятини шакллантириш бўйича ҳамкорликда қатор чоралар амалга оширилиши белгиланган.