Kadastr agentligi tizimida korrupsiyaga qarshi kurashishni yanada kuchaytirish maqsadida pora taklif etgan shaxslarning fosh etilishida tashabbus ko‘rsatgan xodimni moddiy rag‘batlantirish tizimi joriy etilgan.

2021-yilning 17-fevral kuni Kadastr agentligi Zangiota tuman bo‘limi boshlig‘i vazifasini bajaruvchi Azamat Adilovga yengil tipdagi issiqxona tashkil etish uchun ajratilgan yer maydonining topografik syomkasini tasdiqlab berish evaziga fuqaro tomonidan 1000 AQSH dollari miqdorida pora taklif qilingan.

Bo‘lim boshlig‘i pora taklif qilayotgan fuqaro to‘g‘risida Zangiota tuman Iqtisodiy jinoyatlarga qarshi kurashish departamentiga xabar bergan va fuqaroning noqonuniy xatti-harakatlari fosh etilgan.

Bugun yuqoridagi tashabbuskor xodim Kadastr agentligi rahbariyati, Korrupsiyaga qarshi kurashish agentligi vakillari, Toshkent viloyatidagi kadastr tizimining barcha rahbar va xodimlari ishtirokida 10 million so‘m pul mukofoti hamda Xonobod sihatgohiga 2 kishilik yo‘llanma bilan rag‘batlantirildi.

Tadbirda so‘zga chiqqan Korrupsiyaga qarshi kurashish agentligi mas’ul xodimi bu kabi holatlar yurtimizda korrupsiyaga qarshi olib borilayotgan kurashning kichik bir natijasi ekanligi, korrupsiyaning har qanday ko‘rinishiga nisbatan murosasizlik har bir davlat xizmatchisining asosiy shioriga aylansagina ko‘zlangan natijalarga erishish mumkinligini ta’kidlab o‘tdi.

Eslatib o‘tamiz, 2020-yilda Korrupsiyaga qarshi kurashish agentligi va Kadastr agentligi o‘rtasida hamkorlik memorandumi imzolangandi. Unda kadastr tizimi xodimlarining korrupsiyaga murosasizlik kayfiyatini shakllantirish bo‘yicha hamkorlikda qator choralar amalga oshirilishi belgilangan.