Агентлик томонидан Facebook ижтимоий тармоғи орқали бир нечта фуқароларнинг Навоий вилояти Кармана тумани Ободонлаштириш бошқармаси раҳбари Б.Ф.нинг хатти-ҳаракатларидан норози бўлиб йўллаган мурожаати ўрганиб чиқилди.

Ушбу мурожаатда фуқаро Б.Ф. Кармана тумани Ободонлаштириш бошқармаси раҳбари лавозимига тайинлангани, унинг Навоий вилоят ҳокими ва Кармана туман ҳокимига қариндошлик алоқалари борлиги, шунингдек у ходимларни ишдан бўшатиб, танишларини ишга қабул қилишга уринаётганлиги маълум қилинган.

Кармана туман ҳокимлиги ва туман Ободонлаштириш бошқармаси томонидан тақдим қилинган маълумотнома ҳамда бошқа тегишли ҳужжатлар ўрганиб чиқилганда, қуйидагилар маълум бўлди.

Аниқланишича, фуқаро Б.Ф 2020 йил 23 ноябрь кунидан ҳозирги вақтга қадар бошқарма бош муҳандиси вазифасини бажарувчи лавозимида ишлаб келаётганлиги, у бошқарма бошлиғи лавозимига тавсия этилмаганлиги, шунингдек, бошқарма бошлиғи лавозимида умуман раҳбар сифатида фаолият кўрсатмаганлиги маълум бўлди.

Бундан ташқари, ҳозирги кунда Кармана туман ҳокимининг тегишли фармойишга асосан, фуқаро С.С. туман Ободонлаштириш бошқарма бошлиғи вазифасини бажарувчи лавозимида ишлаб келаётганлиги аниқланди.

Шунингдек, Youtube ва Facebook ижтимоий тармоқларида “Тилла бободан Коррупцияга қарши курашиш агентлигига мурожаат” номли видеомурожаатда кўтарилган масалалар ўрганилди. Жумладан, Сурхондарё вилояти Қумқўрғон туманида экин ерлари минглаб одамларга томорқа сифатида сотиб юборилгани, прокуратура томонидан протест киритилишига қарамай Қумқўрғон туманида ноқонуний қурилаётган автомобилларга газ қуйиш шаҳобчасининг қурилиши давом этаётгани, “Сурхон” сув омборининг дренаж системаси устида ноқонуний тўйхона қурилгани, халқаро аҳамиятга эга катта ўзбек трактининг Олма-ота – Бишкек – Душанбе йўли бўйида ноқонуний дўконлар қуриб олингани ва бошқалар ҳақида билдирилган. 

Ушбу мурожаатда кўтарилган масалалар юзасидан ўрганишлар ўтказиш ва тегишли ҳужжатларни Агентликка тақдим этиш бўйича Сурхондарё вилоят ҳокимлигига сўров юборилди.