“E.C.” масъулияти чекланган жамиятининг давлат харидлари бўйича ўтказилган танлов натижаларидан норози бўлиб йўллаган мурожаати Коррупцияга қарши курашиш агентлиги томонидан ўрганилди.

Аниқланишича, 2020 йил 30 октябрь куни “dxarid.uzex.uz” порталида Тошкент вилоятидаги шаҳарлардан биридаги Болалар-ўсмирлар спорт мактабига 800 млн. сўмлик 27 та турдаги спорт инвентарлари сотиб олиш учун танлов эълон қилинган.

Мазкур эълон бўйича “Ж.С.” , “A.” , “М.С.”, “E.С.”  номли МЧЖлар жами 4 нафар талабгорлар ўз таклифларини киритган бўлиб, 2020 йил 11 ноябрь куни харид комиссияси томонидан танлов ўтказилган ва “A.” МЧЖ томонидан берилган 775,7 млн. сўмлик таклиф маъқулланган.

Ўрганишлар жараёнида мазкур танлов ўтказилишида бир қатор қонунбузилиши ҳолатларига йўл қўйилганлиги аниқланди.

Жумладан, “Давлат харидлари тўғрисида”ги Қонуннинг 55-моддасида, эълонда танловни ўтказиш вақти сифатида кўрсатилган вақтда харид комиссияси танлов иштирокчилари томонидан берилган таклифлар солинган конвертларни таклифларни баҳолаш учун очиши, танлов иштирокчисининг ваколатли вакили конвертларни очиш тартиб-таомили чоғида ҳозир бўлишга ҳақли эканли кўрсатилган.

Бироқ, танлов иштирокчисининг вакили танловда шахсан қатнашиши шартлиги ва иштирок этмаслик танловдан четлатишга асос бўлиши белгиланган бўлмасада, харид комиссияси томонидан “E.С.” МЧЖнинг таклифи асоссиз равишда кўриб чиқилмаган.

Шунингдек, “Давлат харидлари тўғрисида”ги Қонуннинг 55-моддасида, таклифларни кўриб чиқиш ва баҳолаш баённомасида таклифлари уларни рад этишнинг аниқ сабаблари кўрсатилган ҳолда рад этилган танлов иштирокчилари ҳақидаги маълумотлар кўрсатилиши белгиланган.

Лекин, таклифларни кўриб чиқиш ва баҳолаш баённомасида “Ж.С.”, “М.С.” МЧЖларининг тижорат таклифларини рад этилиш, “E.С.” МЧЖ танловдан четлаштирилиш сабаблари кўрсатилмаган.

Бундан ташқари, Ўзбекистон Республикаси Президенти ҳузуридаги Лойиҳа бошқаруви миллий агентлигининг 2018 йил 15 майдаги буйруғи билан тасдиқланган “Харид қилиш тартиб-таомилларини ташкил этиш ва ўтказиш тартиби тўғрисида”ги Низомнинг 49-бандида, буюртмачи танловни ўтказиш учун тоқ сонли аъзолардан (камида бешта кишидан) иборат харид комиссиясини тузиши белгиланган бўлсада, харид комиссияси раиси ва 5 нафар аъзолардан иборат ҳолатда жами 6 нафар жуфт таркибда шакллантирилган.

“E.С.” МЧЖ томонидан танлов берилган таклиф 596 млн. сўм бўлиб, танловда ғолиб бўлган “A.” МЧЖ таклифидан (775 млн. сўм) 179 млн. сўм арзон ҳисобланади.

Шунга кўра, мурожаат бўйича тўпланган ҳужжатлар қонуний қарор қабул қилиш учун Ўзбекистон Республикаси Бош прокуратурасига юборилди. Натижада Тошкент вилоят прокуратураси томонидан 2021 йил 5 апрель куни Жиноят кодексининг 167-моддаси 3-қисми “а” банди билан жиноят иши қўзғатилган.

Изоҳ: харид бўйича танловда иштирок этган корхона номлари (жиноят иши якунланмаганлиги сабабли) ўзгартирилган ва қисқартирилган ҳолда келтирилмоқда.